Maria Magdalena - Gula 232

Naatol usab kadto nga nagplano ko nga moadto sa SM City aron mag-grocery. Miingon si Victor nga dili na lang ko magdala og sakyanan kay iya na lang kong hapiton. Sa sinugdan mibalibad ko. Apan nagsige gyud siya og hangyo mao nga nagpa-pick up na lang ko sa iyang taxi didto sa Lapulapu.

Samtang nagdagan ang sakyanan, nagkalingaw mi’g kabildo. Hangtod nga gipadayag na ni Victor sa lintunganay sa iyang pag-offer kanako og ride. Iya kong gipangulitawhan. Nakugang ko sa iyang gihimo. Pero wala ko masuko sa pagpanguyab ni Victor kanako. Kay nasayod na ko nga mao na kini trend karon.

Lahi og style si Victor sa pagpangulitawo. Hangyo-lubo. Dili gustong dugay-dugayon. Gusto niya ang prangka nga tubag. Gusto niyang dihadiha masayran ang akong tubag mahitungod sa gugmang iyang gihalad nako. Dili siya makahulat og dugay.

Pero wala ko magpalit-ag sa iyang diskarte.

“Nganong ako man gyu’y  imong tuyoan?” Gipangutana ko siya. “Nasayod ka baya nga minyo na ko?”

“Nasayod bitaw ko,” ni Victor pa. “Pero wala sa imong kiliran ang imong bana. Dili ba? So we can still make a deal.”

Wala ko motingog.

“Mga matured na kita. Dili na ta mga teenager, Maria,” gikan ni Victor. “I think nga nasayod ka na kun unsay sangpotanan kun ang usa ka lalaki nga sama nako makigrelasyon sa usa ka babaye nga sama nimo.”

“U-unsay buot mong ipasabot?” Gisukit ko siya. -- Sumpayan pa