Paryente

Dear Tita Salie,

Good day. Just call me Ms. A, from Carcar, Cebu. Usa ko ka dalaga ug dunay problema kabahin sa akong gugma.

Sa tinuod lang pilian kaayo ko og lalaki, Tita Salie. Nahimo kung pilian tungod kay maoy akong gusto nga tarong nga lalaki ang akong ikadayon. Naglikay lang ko nga mahisama sa uban nga nagkonsimisyon sa ilang kinabuhing minyo tungod kay ilang nabana labihan ka badlongon.

Na-in love na unta ko sa usa ka lalaki pero naunsa man kini nga kontra man siya sa akong mama nga siya ang akong gipili kay paryente pa kuno mi.

Gisakitan ko’g maayo, Tita Salie, tungod kay mahal kaayo nako siya ug nasayod pod ko nga mahal ko niya. Ug ang mas nakahasol pa gyod nako kay duna nay nahitabo namo niining akong uyab nga akong paryente.

Unsa may akong buhaton? Palihog pasabta ko. Thank you very much and more power to your column.

* * *

Good day,

Mao gyud kini ang kasagarang reaction sa ginikanan kun mahitungod na sa blood relation. Tungod kay bisan kun distant relative na kini maayo gyod silang mo-connect niini ug bililhon kaayo nila ang blood relation. Mao nga dako gyud silang supak nga maminyo ang kadugo o paryente bisan kun layolayo na. Ingon gyod sila niini tungod kay mao man kini ang ilang namat-an og buot. Kay ang atong mga katigulangan sa una maayo gyod kaayong manghinubay sa mga kaliwatan.

Busa kun medyo layo na gyod ang inyong pagkaparyente, sa mata sa balaod puyde ra kamo nga magkadayon. Sa civil ug sa atong simbahan gikan sa 3rd degree palayo gitugotan na kamo nga magminyo.

Ang imo lamang buhaton  mao ang pagkombinser sa imong mama ug imong ipasabot kaniya nga ang inyong pagka paryente layolayo na. Lisod man god silang kombensiron bahin niini kay bisan kun sa balaod nausab na apan mao na kini ang nakapatik sa ilang hunahuna nga lain kaayo kun minyoon ang mag-agaw o paryente pa.

Patabang diha sa imong side nga nakasabot niini ug kamo ang makigsulti sa imong mama. -- Tita Salie