God gives back more

Unang Domingo gikan sa paggawas ko sa ospital, misimba ko sa Alliance of Two Hearts. Bahin sa paghalad og gasa sa panahon sa Offertory ang unod sa ebanghelyo. Kadtong paghatag sa mga sapian og mga dinagkong kantidad sa salapi ug mahalong butang isip halad atubangan sa altar ug kadtong paghulog sa pobreng biyuda sa kataposan niyang sensilyo ngadto sa offertory box, diin gidayeg ni Hesukristo ang gihimo niini. Tungod kay bisa’g mao na lamang kini ang nahabiling bahandi kaniya, kinasingkasing gihapon kining gihalad sa biyuda ngadto sa Ginoo.

Ug miabot ang yugto sa opertoriyo sa misa. Gikuot ko ang pitaka likod sa akong bulsa aron magkuha’g kuwarta. Pastilan, nakurat ko. Usa ka tibuok P500 na man lang diay ang sulod? Pastilan, may palitonon pa ra ba kong tambal, da! “Ah, bahala na, sundon nako kadtong gibuhat sa biyuda didto sa ebanghelyo.” Mao ang nakab-ot kong hukom. Ug gibuhian ko ang gikumkom kong piniling tibuok P500 sulod sa collection bag nga milabay sa akong gilingkoran.

Tapos sa misa, midalikyat ko’g adto sa among trabahoan kay duna mga papeles sa SSS nga paloapon.  Apan pagsulod nako sa akong opisina, nahingangha ko dihang dunay tulo ka sobre nga gitunol ngari nako ang among sekretariya. “Unsa man ni, Day?” Nako pa nga kadawaton-dili. “Ay, daaaa mao nay bunga sa imong kabuotan, Boss, nga gitanom nimo sa among kasingkasing.” Pahiyom nga nagdala’g pasumbingay ang gitubag sa sekretariya. Naintriga ko unsay buot niyang ipasabot. Busa, gibuksan ko ang mga sobre. Ug...

Nahasiga akong mga mata pagkakita ko sa nag-akal nga taglibohon nga mga papel de banko. Daw gikumot  akong dughan samtang nagbasa sa listahan sa mga voluntary contributors nga gisukip pag-apil sa usa sa mga sobre. Pagka wala nako magdahom nga buhaton kini sa akong mga kauban sa trabaho.

Natandog ang akong kasingkasing ug nangahulog ang mga lusok nga nangapusa sa kaapingan human yugyoga sa nakahilak kong kahiladman. Ingon ini ba diay kadako mohatag og bawos ang atong Ginoo? Tiaw bay, ang akong gihalad Niya gamay ra. Unya dihang Iya kining gibalik nako, hasta kapila niya pilopiloa? (Kataposan)