Motuo ka ba’g palihi

Motuo ka man o dili imo kanang katungod. Apan alang kanako, usa kini ka kinaiya o batasan nga nasunod sa una pang katigulangan nga hangtod karon gisunod ug giawat gihapon.

Sa katuigan nga nanglabay ilabi na gyud sa pagsugat sa bag-ong tuig ang katawhan ilabi na ang mga kabos ug timawa, kinasingkasing nga manghinaot nga unta moabunda ang pagpuyo ug labaw sa tanan himsog ang panglawas sa tibuok banay.

Kay kun masakit gud ang usa ka sakop sa pamilya unya wala kay kuwarta dakong suliran kay makawot ang dili katol.  Ug ang labing pait nga labaw pa kapait sa panyawan mao nga kun mosulod ka sa ospital unya wa kay ikadeposito nga linibo pasensiya na lang.

Ka wa say balaud nga motaral niining mga ospital nga balasubas. Kun aduna may balaud, way ngipon dili maantigong mopaak. Maayo pa ang irong buang mopaak pa. Ang nakakuyaw lang kun adunay rabbies.

Kun adunay kauswagan, kinsa may tinuoray nga nabulahan? Kinsa? Tingali, kadto rang naghupot og dagkong katungdanan sa atong gobiyerno, mga politiko nga nagpahimulos sa ilang katungdanan, mga negosyanteng malupigon ug mapahimuslanon nga wala mohatag sa hustong suholan sa atong mga pobreng mamumuo, (puyra lang sa uban nga nituman g’yud sa balaod).

Kini sila ang tinuoray nga nabulahan. Wa makatagamtam ang mga pobre niini. Ang uyamot kaayo nagpabilin lang gihapon nga uyamot. Ang pagsinggit og malipayong Pasko ug Bulahang Bag-ong Tuig, kanunay’ng gilitok sa nagluspad nga mga ngabil nga giuhaw sa bahandi matag abot sa higayon. Apan ang tanan alimpungat lang sa nagduhiraw nga hunahuna.

Tungod sa pagtuo nga moabunda ang pagpuyo uyogon ang sensilyo inig-abot sa bag-ong tuig. Mamalit og lingin nga prutas kay lagi manimasin nga adunay suwerte nga moabot. Apan kun mao ra gyu’y imong sukod, kutob ra gyud ka diha kay ang tanang linalang ning kalibotan aduna nay iyang dalan nga gisubay nga maoy tinuoray niyang kapalaran. Hagbay pa bang inuyog. Pila na kaha ka alkansiyang nabuak? Pila na kaha ka lingin nga prutas ang nadunot? Dili na maihap sa tudlo.

Kadaghanan sa mga kabos motuaw sa pag-ingon: Makagurdo pa lang unta ko sa lotto? Makakubkob pa lang unta ko’g bulawan?  Makamina pa lang unta ko’g carbon? Masawom pa lang unta nako ang kahiladman sa dagat ug mahipos ang masigang perlas, kaayo ra unta. Apan ang tanan damgo lang mora’g ang kanta ni Tom Jones, “My Elusive Dream.”

Ang mahinungdanon nga makakaon ta katulo sa usa ka adlaw ug himsog kanunay ang panglawas sa tibuok pamilya. Ang gikinahanglan karong panahona mao ang kakugi. Mokayod kutob sa mahimo aron atong matubag ang panginahanglan sa matag adlaw.

Bag-o man gyung nanglingkod ang mga napili sa miaging eleksiyon, atong ipanghinaot nga kahatagan sa tinuoray nga pag-alagad ang katawhan ilabi na g’yud ang mga kabos ug timawa. Sulugoon man kaha sila sa lungsod? Dan, atong hangpon ang ilang pag-alagad kay kita...kita maoy ilang agalon.