The bearer is the owner

Samtang namakero sa ilang kabaw, mipahimulos usab si Jumar sa pagpahuway diha sa ilawom sa dakung punoan sa Lumboy. Naghayang siyang mihigda diha sa nagpasad nga mga layang dahon, samtang ang usa niya ka kamot gitabon niya sa iyang nawong. Aron matabunan kini ug dili kaayo madepalita sa silaw sa adlaw. Kay ang usa usab niini mao may iyang giunlanan.

Sa mao niyang posisyon naghanduraw si Jumar.Ug sa iyang paghanduraw maoy mipasunding diha sa iyang pangisip ang matahom nga larawan ni Neneng. Ang bugtong babaye nga maoy nakapapitik sa iyang kasingkasing. Ang binuhat nga maoy nagtudlo kaniya, kun unsay gugma.

Bata pa man god unta kaayo si Jumar, ug dili pa unta angay nga mag-apil-apil nianang gitawag og gugma. Apan tungod lang sa kanunay nilang panag-uban ni Neneng, nga maoy nakapasuod kaayo kanilang duha, nakat-on na hinuon siya. Sa dili pa unta niya angay nga makat-unan, tungod lagi kay bata pa man kaayo siya.

Sa sinugdanan, inigsuon man lang unta ang pagtagad niya kang Neneng. Gani, giisip niya kining iyang maguwang. Kay daku man og edad si Neneng kay kaniya, kang Jumar. Magkinse pa man lang gani si Jumar, ning umaabot nga buwan. Nga maoy kasumaran sa adlaw niyang natawhan.

Nahimong suod ni Jumar si Neneng, kay kanunay man silang magkauban, sa mga panahon nga walay klase. Kanunay gayud silang magkakuyog, sa pagpangaligo sa dagat, sa pagpangahoy, ug pagpanglamaw og mga bugtong. Didto sa kalubian nga gipanag-iya nila ni Neneng.

Hasta pa gani sa pagpanimba didto sa simbahan sa ilang lungsod, mag-uban gayud sila. Lakip na, kun manambong sila’g mga kalingawan o disco ba hinuon. Ilabi na kun dunay mga pista, sa laing mga barangay. Hinuon, may mga kauban usahay sila. Nga mga higala ra usab nila ug taga ila ra usab.

Ang usa gyud sa mga hinungdan kun nganong nahimo niyang suod ni Jumar si Neneng, kay siya man si Jumar maoy gihimong bearer ni Neneng ug sa uyab niini. Nagkauyab man god si Neneng ug ang usa sa mga ig-agaw ni Jumar. Ug siya si Jumar maoy gihimong tig sa duha. Ug gihimong taytayan, sa ilang mga pagbati.

Misugot lang si Jumar sa papel nga gisangon kaniya sa duha ka managtrato. Apan  sa tinuoray, bation baya siya’g pangabubho, ngadto sa iyang ig-agaw. Nga maoy uyab ni Neneng. Ilabi na, kun makita niya nga maglabing-labing na ang duha. Dili  man lang mauwaw ang duha nga magkarinyuhay, bisan kun anaa si Jumar, uban kanila. Mora pa gani og magpaibog kini kang Jumar.

Apan miabot ra ang higayon nga nagkabuwag ang duha, nahibaw-an man god ni Neneng nga dunay laing trato ang iyang uyab. Pwerteng sukoa ni Neneng, niadtong higayona. Ug mihukom dayon kini, nga makigbuwag nalang sa iyang trato. Nga gikalipay usab kaayo ni Jumar.

Aron lang kaha sa pagpalagot sa iyang uyab, gigamit ni Neneng si Jumar nga instrumento. Tuyuan gayod ni Neneng sa pagparayeg ngadto kang Jumar, kun anaa ang uyab niini. Ganahan usab kaayo si Jumar, sa gibuhat ni Neneng, ngadto kaniya. Hangtud na gyud hinuon, nga gitugkan na siya’g gugma ngadto sa babaye.

Mora’g gibati’g kahimuot si Jumar nga naghuna-huna, sa nahitabo kanila kang Neneng. Wala man god siya magdahom, nga ang inigsuon niyang pagbati ngadto kang Neneng, mosangpot sa ingon. Ug mahimong usa ka matuod nga gugma. Kay sa ngadtongadto, nagkasinabtanay na man lang gyud sila si Jumar ug Neneng. Sila na man sab ang nagkauyab ning higayona. (Kataposan)