Bar dancer - Gula 6

Pareho sila si Philip ug Joan nga nakalitan ug wala dayon makatingog dihang nagkaabot ang ilang mga panan-aw. “Nag-unsa ka dinhi Philip?” gipangutana ni Joan ang iyang boyfriend nga wala na magtagad kaniya.

Wala makatubag si Philip. Dili niya ikatug-an kang Joan nga miadto siya aron sa pagbisita ni Emerald nga ig-agaw ra diay ni Joan. “Managkaila diay kamong duha Joan?” ni Emerald pa nga nahibulong kaayo.

Bisan og wala motubag si Joan sa pangutana sa iyang ig-agaw apan nakasabot na lang si Emerald nga adunay relasyon si Joan ug Philip. “Maayo nga magsultihanay mo’g maayo. Didto sa may harden dunay inyong kalingkoran,” giingnan ni Emerald sila si Joan ug Philip.

Daw nahilis sa kauwaw si Philip ngadto ni Emerald nga iyang gipanguyaban apan ig-agaw diay sa kanhi niya girlfriend. Pabilin nga nagpakahilom lang si Philip ug daw dili makatutok kang Joan.

“Pwede ba kita nga magsultihanay kadiyot Philip?” matud ni Joan. Mitangdo si Philip ug mitindog siya. Gisunod ni Philip si Joan nga mipaingon sa harden.

Nahabilin sila si Emerald ug Randy nga pareho nga nagsunod pagtutok kanila ni Joan ug Philip. “Tug-ani ko Randy, may relasyon diay sila’ng duha si Joan ug ang imong amigo?” pangutana ni Emerald.

Walay nahimo si Randy gawas sa pagtug-an sa tanan ngadto kang Emerald. Bisto na ang baraha ni Philip. “Swerte nga wala nako gisugot si Philip kay malumpong unta mi niya nga mag-agaw,” matud ni Emerald.

Didto sa harden. “Kumusta ka na man Philip?” si Joan maoy mibuak sa kahilom kanilang duha. “Oki lang. Wala ka na man diay kuno mag-dancer didto sa Wild Orchids,” matud ni Philip.

Gitug-anan ni Joan si Philip nga mibiya na siya pagka dancer ug gigamit niya ang gamay niya nga tinigum ug gihatagan usab siya sa amahan ni Emerald og gamay’ng kantidad nga ikapuhonan og negosyo.

“Mibiya na ko pagka dancer kay nagtoo ko nga gikauwaw nimo ang akong trabaho. Nalingaw na lang usab ko karon pagdumala sa akong gamay’ng grocery sa Carbon Market,” ni Joan pa nga nagpahiyom.

Igo lang miyango si Philip. “Ikaw, kumusta ang imong lovelife, gisugot ka na ba sa akong gwapa nga ig-agaw?” matud ni Joan. Daw natuk-an si Philip ug wala makatubag sa pangutana kaniya ni Joan.

“Sagdi lang, tabangan ko ikaw nga sugton sa akong ig-agaw,” matud ni Joan nga mihinay-hinay sa pagbarog. Miduol kanila si Emerald. “Nasayud na ko sa inyong kaagi’ng duha. Tambag nako ninyo nga inyong dugtongon pagbalik ang inyong pagminahalay,” ni Emerald. - Sumpayan