Naa gihapon sa heart

Dear Tita Salie,

Have a nice day. Tagoa lang ko sa ngalan nga Bro, from Cebu. Nagsugod ang akong problema dihang nakarelasyon ko og usa ka babayeng minyo apan annuled na sa iyang bana.

Ulitawo pa ko, Tita, ug wala pay kabilinggan sa kinabuhi. Nakasuod nako ang  usa ka babaye nga bulag sa bana ug duna siya’y  3 kabuok anak nga anaa kaniya. Naluoy ko sa maong babaye, hangtod nga na-develop  gyod ko niya. Ako siyang tabangan sa iyang mga problema kun kaya sa akong power hangtud nga nagkauyab gyod mi.

Dili perfect ang among relasyon. Kanunay pod ming mag-away pero magkabalik ra gihapon. Usahay lang gyod lisod sabton ang batasan sa usa ka babaye. Hangtud miabot ang panahon nga wala na namo mapugngi ang among garbo ug nagbulag na gyod mi. Hangtud karon wala na ang among communication pero kanunay ra nako siyang makit-an kay silingan ra man mi.

Hangtud karon, Tita, anaa lang gihapon siya sa akong heart bisan pa man kun dili na kami. Unsa may akong buhaton? Palihog pasabta ko. Thank you and God bless you always.

* * *

Dear Bro,

Natural lamang ang away sa usa ka relasyon. Wala gyo’y relasyon nga atong matawag nga perfect ug walay away. Because matud pa kitang tawo is unique, and since unique managlahi gyod ang atong kinaiya, batasan ug bisan plano sa kinabuhi, ug panglantaw sa buhay. Tungod niini dili gyod kalikayan nga dunay managsumpaki nga mahitabo tali kanato. Ang importante nga makamao kitang modala niini. Makamao kitang mopauso ug andam kanunay nga mohatag og pasaylo ug dili paharion ang garbo sa atong kasingkasing aron ang gamay nga bingkil-bingkil dili modako nga maoy hinungdan sa pagkabungkag sa nahiusang gugma. Busa mas nindot ang pagpuyo kun kanunay ang panagsultianay, sinabtanay aron malikayan ang away.

Kun nahigugma ka pa gihapon niining babayhana, puyde nimo siyang panguyaban pagbalik. Hangyoa siya nga magkaestorya mo aron imong ma-discuss ang butang nga maoy hinungdan sa inyong away.

Kun ania pa usab kaniya ang pagbati kaniadto nga natabonan lamang sa garbo. I am pretty sure mobalik gyod ang inyong relasyon kay matud pa sa panultihon “love conquers everything”. Kanunay gyod nga magmadaogon ang gugma. -- Tita Salie