May katumbas ang pagsanong sa Diyosnong hagawhaw

Hinay ang mga lakang ni Gilyer nga misulod sa simbahan paingon sa atubangan. Dihang duol na siya sa altar, miluhod siya ug nag-ampo. May problema siya. Nakaguba siya’g aparatus didto sa ilang laboratory class kaganina ug nagkinahanglan siya’g P3,000 aron maoy ibayad niini. Apan P500 na lang ang nahabilin sa iyang pitaka. Asa? Asa siya’g igong salapi?

Kini mao ang rason nganong sa dili pa siya mopauli sa ilaha, mihapit siya dinhi sa Sto. Rosario Church aron magpalaban sa atong Ginoo. Hibawo siya nga motabang gyod and Diyos sa nanginahanglan, basta mosangpit lang kini Niya.

Gipiyong na ni Gilyer iyang mga mata aron sugdan na unta ang iyang pagpamarayeg sa Kahitas-an dihang may nabati siyang nagbakho. Naabli iyang tabontabon ug maoy nakuwadro sa panan-aw niya ang usa ka gulangong babayeng nagluhod-nangadye didto atubangan sa altar. Ambot unsang pagkaunsaa nga samtang siya nagsud-ong sa makaluluoy’ng bayhon sa babaye, ingon sa may talagsaon mang gahom nga mikumot sa iyang galamhan, unya aduna pa gyoy malumong tingog nga mora’g mihunghong niya: “Gilyer, kanang kataposang P500 nga anaa sa pitaka mo, ihatag anang babaye.”

Naigking si Gilyer sa iyang nadungog. Nagkinahanglan baya siya’g P3,000 alang sa naguba niyang aparratus. Unya, ipahatag pa gyod ngadto sa babaye ang last money niyang P500? Mosamot nga wala na gyod siya’y ikabayad? Apan nakaila si Gilyer kinsay tag-iya sa maong hagawhaw. Kinsa kining tingog nga nagmando-nangablit sa iyang kasingkasing. Busa, maoy mipasulabi sa iyang balatian ang kaluoy ngadto sa babaye, kinsa ubos sa iyang tan-aw, mas nanginahanglan pa’g kuwarta kay kaniya.

Sa daklit, gikalimtan ni Gilyer ang iyang suliran. Giduol niya ang naglago nga babaye, gikuhit. Ug dihang miyahat, iyang gitunol ang tuskig nga P500. Nakapahiyom ang luhaang babaye nga mihawok sa kuwarta dungan ang pagtuaw: “Ginoo, daghang salamat nga gidungog mo ang akong pag-ampo.”

Ingon sa malanay si Gilyer human mabati ang gipamulong sa babaye. Daw baraw kini nga giduslak sa iyang kasingkasing. Apan dili kahapdos ang iyang gibati. Kun dili, kalipay. Kalipay nga espirituhanon. Kalipay nga ingon sa wala’y pagkapupos!

Pag-uli ni Gilyer sa ilang balay, nauntol siya sa iyang gibarogan dihang gisugat siya sa iyang Papa Simo og lamano dungan ang pagtunol og P10,000.

“Anak, congratulations! Gikalipay ko’g dako nga gipahibalo ming duha sa Mama mo, pinaagi sa sulat sa inyong Dean, nga ikaw diay pirme ang nag-una sa ilang Dean’s List. Keep up the good work, Dong. Ug di lang kay P10T ra unya’y among impremyo nimo.”

Naestatuwa na gyod si Gilyer sa iyang nahimutangan. Sa makausa pa, iyang nabati ang presensiya sa Ginoo. Buotan gyod kaayo ang Diyos. He listens to prayer. Nahunahuna man god niya nga ang iyang gipangayo ni Lord, P3,000 lang. Unya, gihatagan siya’g P10,000? May katumbas ba diay ang pagsanong sa Diyosnon niining hagawhaw? (Kataposan)