Bar Dancer

Nagkasabot ang hiniusang team sa Cebu City Hall nga mohimo sila’g kinalit nga inspection sa mga bar ug imnanan dinhi sa dakbayan kay nakadawat sila og daghang report nga adunay mga dancers nga mosayaw nga wala’y sapot atubangan sa ilang customers.

Abtik kaayo ang reporter nga si Dante nga mibulontaryo nga mokuyog siya sa inspection inigka-gabii. Mipasalig usab ang ubang mga reporters nga mouban sila sa inspection. Ang nasabutan nga dunay mga sakop sa City Hall nga mouna na pagsulod sa bar nga ilang gipanid-an.

Naapil ang Wild Orchids Bar nga gipanid-an sa City Hall kay duna kuno’y mga dancers nga mopakita-kita sa pribado’ng parte sa ilang lawas atubangan sa nagpanilap nila nga customers.

Nagpahiyom lang ang laing reporter nga si Philip ug wala mopasalig nga mouban siya sa inspection kay may lain diay siya’ng tumong. Gusto ni Philip nga mag-una siya pagsulod sa Wild Orchids Bar.

Tuod, alas utso sa gabii didto na ang composite team sa mga kawani sa City Health Department, Treasurer’s Office, Office of the Building Officials, Bureau of Fire Protection ug City Anti-Indencency Board nagpahigayon og briefing kun unsay ilang pagahimoon .

Nagpadaplin lang si Dante ug ang ubang reporters nga naminaw sa pahimangno sa doktora nga maoy lider sa grupo. Didto sa Wild Orchids Bar nakapahimutang na si Philip nga nagpatoo nga yano lang customer.

Gipanid-an usa ni Philip ang palibot. Mga siyam pa sila nga customer sa bar atul sa mao nga higayon apan kadtong grupo nga diha g’yud sa atubangan maoy gihugopan sa mga babaye.

Nakadungog si Philip sa estorya sa mga waiter nga galante kaayo mohatag og tip ang tawo nga upawon nga gipataliwad-an sa duha ka gwapa nga dancers mao nga daw pinangga kaayo kini nila.

Migawas sa stage ang usa ka dancer. Nakabantay si Philip nga ang maong dancer mao kadtong nagsikit-sikit pag-ayo sa upawon nga lalaki kaganina. Dihang nabantang ang panagway sa babaye sa suga, nakita ni Philip nga gwapa g’yud tinuod ang maong dancer.

Gisinyasan ni Philip ang waiter. Iyang gipangutana kun pwede pa niya nga itibol ang dancer human niini’g sayaw. “May customer na siya sir, kanang anaa sa atubangan,” matud sa waiter.

 Taud-taud, nakita ni Philip nga nanaug gikan sa stage ang babaye ug samtang nagsayaw miduol kini sa lamesa sa lima ka lalaki diin didto maglingkud ang upawon nga tawo.

Naniyagit ang mga kauban sa upaw kay giduol kini sa dancer nga miaksyon na og pukas sa iyang nipis kaayo’ng tabon sa pribadong parte sa iyang lawas. -- Sumpayan