Doctor, ‘nailad’ sa pasyente

“Bida! Maayo gyud nakong pagkailad ining mga tawhana!” tuaw ni Dr. Albin Luga. Apan nagpahiyom siya samtang nagbarog karong sayong kahaponon sa too sa limousine nga serbis niya. Bag-o lang siyang nanamilit sa managtiayon nga iyang mga pasyente. Sila si Noy Celso ug Nang Nova. Gikarga pa sa drayber, sa baggage ang upat ka plastic bag nga bring house ni Albin.

Nagkinagang nga naghatud niya sa parkingan sa limousine ang managtiayon sa plastic bag nga mga pagkaon nga nagkadaiyang putahe sa mga sud-an. Nag-apod ilang wala ug tuong kamot sa pagbitbit sa para bring house ni Albin.

Paniudto ang imbitasyon nila. Piyesta sa ilang lungsod sa Amiraw. Dili pabalibad ni Albin iyang mga pasyente. Maong nananda gyud siya og ahat sa hikay sa managtiayon.

Kun nganong nakatuaw siya nga maayong pagkailad niya sa managtiayon nga pasyente niya, ibalik nato ang panahon sa nilabay’ng unom ka bulan sa unang pagkakita ni Albin sa managtiayon.

Usa ka hapon, nisulod sa iyang klinika si Noy Celso ug Nang Nova nga mga pobre kaayo og hitsura. Nagsinilas lang sila. Mga daan ug kupas na ang mga sapot nga gisul-ob. Nagdala og buyot si Noy Celso nga gisudlan sa ilang bawon nga pinutos og dahon sa saging. Pinutos og panyo ang kuwarta nilang dala.

Gihotoy sa ubo nga way putolputol si Noy Celso. Unya gihilantan. Pagpa-X-ray sa iyang baga, nasayran nga naputos sa plema iyang baga. Naglisod na siya og ginhawa. Gipa-admit dayon ni Albin. Si Nang Nova may diabetes. Hapit nabuta.

Gitambalan gihapon ni Albin. Si Noy Celso iyang gioperahan. Gibuslotan ang toong kilid unya gipasuyopan iyang baga sa mga plema.

Out-patient lang si Nang Nova. Si Noy Celso nakahigda og napulo ka adlaw sa ospital. Tungod kay manggiluy-on si Albin sa mga kabos nga pasyente, tunga ray iyang singil sa iyang consultation fee, ug sa tanang serbisyo niya isip mananambal. Malipay lang siya nga makatabang og kabos. Ug nalipay sab siya nga maayo na si Noy Celso. Ug si Nang Nova, kontrolado na iyang dayabitis. Unya human adto, wa na sila magkita.

Unya takulahaw lang, ganihang buntag, gipakuha siya og limousine sa managtiayon. Ang drayber nga batan-ong lalaki, nagdala og selpon. Pagbagting, gihatag sa mananambal.

“Doc, makig-istorya nimo ang akong mga amo nga magtiayon, nga imong mga pasyente” sa drayber.

Nakurat siya pagkasayod nga dunay limousine ang nailhan niyang pasyente nga mga kabos nga managtiayon.

Dayon, pag-abot niya sa panimalay sa iyang mga pasyente, usa ka dakong mansiyon. Tag-iya diay og mga bus iyang mga pasyente. Nagbiyahian ang mga bus di lang sa tibook probinsiya sa Sugbo, hasta sab sa tibook Visayas ug Mindanao.

Maong nakaingon siya nga nailad siya’s iyang mga pasyente. Nagpapobrepobre, aron di niya hustohan og paningil sa bayranan sa iyang serbisyo. Unya puwerte diay’ng datu-a.

“Salamat kaayo ninyo, Noy Celso, Nang Nova” ni Albin pagdayon niya’g sakay sa limousine. Wa na lang  niya usba iyang tinawgan sa mga pasyente.

“Way sapayan” ni Noy Celso.

“Gipadalhan ka namo’g bring house daghan kay nagduda ming wa ka nabusog” ni Nang Nova.

Nagpahiyom nga nagpanglingo si Albin sa pag-arangkada sa limousine. VIP treatment man siya sa iyang mga pasyente. (Kataposan)