Gisugsug si Pedot

Naghilak si Pedot nga mipauli sa ilang balay ning udotha nga gikahibulong nilang noy Antoy ug nang Arsing nga talilakaw na paingon sa tiyanggihan sa ilang baryo.

“O, nganong naghilak man ka, Dot, nga miuli sa atong balay!” sukot ni noy Antoy nga nahingawa sa bugtong anak nila ni nang Arsing.

“Bitaw, Dot! Di ba apil ka’s nangaligo sa katalirungan mong kabataan didto sa linaw sa sityo Biasong...?! dason ni Nang Arsing nga miduol sa bugtong anak nga nilingkod sa ilang hagdanan nga kawayan sa may pantawan.

“Gipakaulawan ko nilang Miyot, Pulok ug Rico didto sa linaw, Pa, Ma! Nagtan-aw ra ba sila’s Adel, Merta ug Mayla nga katalirungan kong batang babaye ug klasmet sa Grade five...!” ni Pedot nga nagpamahid sa iyang luha. “Maligo man gud unta ko nga magpurol lang. Apan kalit kong gikuptan nilang Miyot, Pulok ug Rico, kay nagduda kuno sila nga wa pa ko matuli. Gihuboan ko nila sa akong purol ug brief. Ug nakita gyud nilang tanan nga pisot ko...!”

“Giingnan bitaw tika niadto sa nag-edad pa ka’g 6 nga magpatuli ka, apan nagdumili man ka, Dot...! matud ni Noy Antoy nga mipikpik sa abaga ni Pedot.

“Karon nga nag-edad na ka’g 11, samot na nga maulaw na kang magpatuli, Dot!” nagpanglingo usab si nang Arsing nga naluoy sa bugtong anak.

“Hadlok man gud kong magpatuli, Pa, Ma! Kuyawan ko! Wa man ko maliwat ni Papa, uy...!”

Nagkatinan-away sila si noy Antoy ug nang Arsing. Unya, gibitad ni noy Antoy si Pedot sa pagpasaka sa itaas sa ilang balay. Gipalingkod sa amahan ang bugtong anak sa lantay ug gialam-alaman.

“Ayaw lang na’g problemaha nga wa pa ka matuli, Dot...!”

“Maulaw na man ko, Pa! Nakita na nilang tanan ganiha...!”

“Aw, ingna lang gud, iniglabay sa pipila ka semana nga natuli na ka...!”

Puwede ra ba gud diay nga dili magpatuli, Pa...?”

“Aw, oo, Dot, uy! Liwat ka nako...!”

Nahatutok si Pedot kang noy Antoy. Dugay kaayo. Unya, nanambo ang iyang pahiyom nga mi-aper sa iyang amahan. Wa magdahom si Pedot nga wa sad diay matuli iyang Papa. (Kataposan)