Maria Magdalena - Gula 218

Samtang nagkaon si Bob, nagkalingaw sab ko’g kaon sa halo-halo. Wala hutda ni Bob ang gi-order niyang pagkaon. Mihungit lang siya’g pipila ka kutsara ug miundang na siya.

“Unya, unsa may atong panagsultihan?” Nangutana ko ni Bob.

“Dili pa klaro nako ang atong situwasyon, Maria,” laktod niyang tubag.

“Ngano man diay ang atong situwasyon?”

“Dili ko mosugot nga bugtoon mo sa dakong kasayon ang atong relasyon, Maria. Kini ang hinungdan nga wala ko mohunong sa pagpangita kanimo, Maria.”

“May lain nang lalaki sa akong kinabuhi, Bob. Gisultihan ko na ikaw niana, di ba? Nag-live in na mi. Busa...”

“Wa koy labot sa inyong relasyon. Ang importante alang nako mao ang atong relasyon.”

“U-unsa ba gyu’y gusto mong mahitabo?”

“Dili ko manghilabot ni magsamok sa inyong pagpuyo uban sa imong ka-live in karon basta magpadayon sab ang atong relasyon.

Di ko katugot nga magpadayon mo ug wad-on ang ato, Maria.”

“U-unsa?”

“Gamay rang panahon ang akong pangayuon nimo, Maria.”

“Usa ka dakong binuang ang gusto mong mahitabo. Di ko makahimo niana, Bob.”

“Makahimo ka, Maria. Nasayod kong makahimo ka kay anad ka nang mohimo og binuang.” -- Sumpayan pa