Salamat Lord!

Sukad sa nahitabong linog sa buntag niadtong Agosto 15 niining tuiga hangtod karong panahona daghan lamang gihapon ang makugangkugang tungod sa matag karon ug unya nga mahitabong pagtay-og.

Si Rolando Montanez sa Philippine Volcanology and Seismology (Philvocs) nga nahinabi niining tagsulat miingon nga  ang tanan nga nasinati nga pagtay-og nga ang iyang epicenter gikan sa nagkalainlaing dapit sa Bohol ilang giila nga mga aftershock sa labing kusog nga unang nahitabo niadtong Oktubre 15 sa buntag.

Matud pa niya nga walay nahitabong bag-ong linog nga nasinati tungod kay sa ilang natala ang epicenter sa mga pagtay-og pulos man naggikan sa lalawigan sa Bohol.

Gitataw niya nga ang aftershock nga matawag gihapon nga linog apan dili sama ka kusog sa nag-unang linog nga nakamugna og mga kadaut sa pipila ka edipisyo, nakaangol og mga tawo  ug mikalas pa og daghang kinabuhi.

Si Montanez miingon nga dili na angay mabalaka ang katawhan sa mga aftershock kay mao man gayod kini ang mahitabo sa matag higayon nga adunay nahitabong linog.

Dugang pa niya nga angay lang hinuon nga likayan sa mga tawo ang pagsulod sa mga edipisyo nga nakasinati na og kadaut sa unang linog kay sa matag karon ug unya nga pagtay-og sa aftershock kuyaw man nga maigo sa matagak nga tipaka nga matiwas sa pagkahagsa.

Ang mga batid nga civil engineer ug structural engineer nga nahinabi ning tagsulat mipasabot nga ang edipisyo nga ginama sa puthaw dili dali nga mahugno bisan sa kusog nga pagtay-og.

Matud pa nila nga lig-on ang puthaw ug ang kuyaw lang kun adunay bahin nga semento nga motagak ug mataymingan ang tawo nga maigo nga maoy makaingon sa pagkaangol o mamatay.

Dugang pa nila nga kuyaw hinuon sa linog ang edipisyo nga ginama sa kahoy kun gabok na ang haligi ug mga dapat niini kay dali man kining mahagsa ngadto sa yuta tungod sa kusog nga pag-uyog. Apan  kun lig-on ang iyang haligi ug mga dapat niini dili usab kini kuyaw kay magtuyatuya man lang kini sa panahon sa pagtay-og.

Si Monsenyor Achiles Dacay nga nahinabi sa usa ka sibyaanan sa radio sa iyang pamahayag miingon nga ang linog mugna sa kinaiyahan ug paagi kini sa pagsuway sa katawhan sa ilang pagtuo ngadto sa Labaw nga Makagagahom.

Dugang pa niya walay gipihig ang Ginoo og relihiyon nga maigo sa linog kay mahimong Romano Katoliko, Christian ka man, Muslim  ug uban pang gipasakopan nga relihiyon mahimo man nga  mga biktima ug dili nato kini isipon nga gaba.

Bitaw sad, ang maayo natong buhaton human sa maong katalagman nga nakalikay kita sa kadaut nga maghiusa kitang tanan sa pag-ingon…”Salamat Lord!”