Gahum sa lumay

Gula 5

Gibati ni Fernan nga bakikaw kaayo sila tan-awon si Loren nga nagkuyog tungod sa ilang lagyo nga pangedaron. Natan-aw ni Fernan nga mora’g subra lang og gamay sa 20 ang pangedaron ni Loren.

Nahinangop na lang hinoon si Fernando kay mora’g wala lang kaayo kini hatagi og pagtagad ni Loren. Gani siya man maoy gipalabi ni Loren dihang mipili ang dalaga kun hain kanila ug sa iyang hinigugma ang iyang ubanan.

Bisan si Fernan wala makatoo nga miapas kaniya si Loren ug gibiyaan ang iyang hinigugma nga mikuha unta kaniya. Sa tan-aw ni Fernan ambongan man gani ang boyfriend ni Loren ug batan-on pa. Nahuna-huna ni Fernando nga misalir g’yud ang gihatag kaniya nga lumay ni Tatay. “Mangaon usa ta Lor kay tan-aw nako gigutom ka na,” giingnan ni Fernan si Loren.

“Tana, unya inigkahuman, manuroy ‘sa ta ha?” matud ni Loren nga daw klaro na kaayo nga naparaygon ngadto kang Fernando. “No problem, bisan og let’s morning the night pa,” nangomedya si Fernan sa promo.

Nanulod sila sa usa ka kan-anan ug miorder og pagkaon. “Wala g’yud ko makasabot sa akong gibati karon Fernan. Humot g’yud kaayo ka para nako. Nindot kaayo ka nga simhoton ug hagkan,” matud ni Loren.

Nakapahiyom si Fernando nga nakadungog. Sigurado na siya nga misalir ang lumay ug nabihag na niya si Loren. Nangaon sila. Nakabantay si Fernando nga nagsigi og tutok kaniya si Loren nga daw nagpamahit sa iyang ngabil.

Human sa ilang pagpangaon. “Unya asa man ta karon Loren?” matud ni Fernan. “Ikaw lagi ang mahibawo, kuyog g’yud ko nimo bisan asa,” dali nga tubag ni Loren. Nahuna-huna ni Fernando nga busog na sila.

“Gusto ka ba nga mamahuway usa ta?” ni Fernando pa. Wala motingog si Loren. Mipara og taksi si Fernando. “Sigi na, sakay na Lor,” giingnan ni Fernan si Loren. Pabilin nga nagpakahilom ang promo nga migunit sa iyang kamot.

Miuna pagsulod sa taksi si Loren ug misunod si Fernando. Dihang nakapahimutang na sila sa luyo nga lingkoranan, giingnan ni Fernando ang drayber nga magpahatud sila sa usa ka motel sa Subangdaku.

“Hala uy, dad-on ko nimo sa motel?” hinay’ng tingog ni Loren nga gidunganan sa pagkusi sa bukton ni Fernando. Wala motubag si Fernando apan nakabatyag siya nga gusto ni Loren nga mangadto sila kay misamot pa gani kini sa pagparayeg kaniya.

Migakus na gani si Loren sa iyang wala nga paa samtang nagtupad sa paglingkud. Gibati na og dili tiaw nga pagbati si Fernando. - Sumpayan