Gahum sa lumay

Gula 2

Naagni g’yud si Fernando nga mangayo’g lumay sa tiguwang-lalaki nga gianggaan lang og Tatay. Nakita ni Fernan nga ang tiguwang mikuha og gamay kaayo nga botelya ug gisudlan kini’g lana. “Isagol kini sa imong perfume Ondo ug kun ang imong magustoan nga babaye makahanggap na sa imong pahumot, huwata’g kadiyot kay magsigi na kini og bai-id nimo,” matud ni Tatay nga nagngisi.

Nakapahiyom si Fernan nga ingon sa katoohon-dili sa gisulti sa tiguwang. “Pila may akong bayranan nimo Tay?” gisukna niya ang tiguwang. “Ayaw, unya na ko hatagi’g pahalipay kun mamatud-an na nimo ang kaepektibo sa akong lumay.”

Mora’g hinay-hinay nga nakatoo si Fernan nga epektibo g’yud ang gihatag nga lumay sa tiguwang kay unya ra man kini magpabayad kun matestingan na niya.

Misirit si Fernando sa pag-adto sa usa ka department store. Mipili siya’g perfume nga mahalon g’yud aron humot. Nangomedya usa si Fernan sa promo sa pahumot.

“Ikaw ang akong papilion miss kanang humot g’yud kaayo bahala na’g mahal,” giingnan ni Fernan ang promo girl. Tuod gitunol sa promo kaniya ang imported nga pahumot. Apan kapin sa P2,000 ang kantidad.

“Kana humot g’yud na kaayo sir,” matud sa promo nga nagpahiyom. Gibayran ni Fernan ang perfume ginamit ang iyang credit card. Dayon, miadto siya sa Comfort Room.

Giswerte si Fernan kay dili spray ang maong perfume. Ablihon lang ang tabon niini ug ihumod sa kabahin sa sineda o parte sa lawas. Iya dayon nga  gibutangan sa lana ang perfume.

Dihang nasulod na ang lana, giuyog ni Fernan aron masagol pag-ayo ang lumay sa pahumot. Dayon, gipaghid ni Fernan sa iyang kwelyo ug ubang parte sa iyang T-shirt.

“Kahumot uy!” nakadungog si Fernan nga adunay ubang lalaki nga didto sa CR nga nakahanggap ug midayeg sa kahumot sa iyang perfume. Nakapahiyom si Fernan sa hilom.

Mibalik si Fernan didto sa gipalitan niya sa perfume. Nakita niya nga nagpahiyom ang promo nga nagtan-aw kaniya nga nagdanga-danga. “Dili g’yud ka magmahay ana nga perfume sir,” matud sa promo.

“Tan-awa, humot lagi kaayo ang perfume. Nangalimyon sa kahumot,” giingnan si Fernan sa promo. Nagpasumangil si Fernan nga namili pa og laing pahumot.

“Humota nimo sir uy! Kalami nimo hagkan,” matud sa promo girl. Nakabantay si Fernan nga ingon sa nagkaanam og kaparaygon ang promo ngadto kaniya.

Anam-anam na nga motoo si Fernan nga epektibo gayud ang lumay nga gihatag kaniya ni Tatay. Taud-taud, migunit na g’yud sa bukton ni Fernan ang gwapa nga promo. “Sugot ka sir nga makigdeyt ko nimo inig-out nako karong gabii?” gisukna si Fernan sa promo. - Sumpayan