Bata pa

Dear Tita Salie,

Maayong adlaw kanimo, Tita ug sa tanan nga kauban nimo diha sa Banat News. Ako diay si Jabar 27, years old, from Cagayan de Oro, apan nia karon sa Cebu, kay dinhi man ko nangita og panginabuhian ug dinhi usab nako makaplagi ang babaye nga akong gipangandoy.

Duna koy uyab karon ug love kaayo nako siya. Apan ang akong gikaproblemahan tungod kay layo kaayo ang agwat sa among pangidaron. 18 pa lang siya karon, Tita. Misalig man ko niya apan nahadlok man gihapon ko nga makakita unya siya og ka same age niya, Tita. Karon ra ba kay panagsa ra mi magkita tungod kay bisi man kaayo ko sa akong trabaho.

Nasayod pud ko Tita, nga dili pa kaayo ligdong ang iyang panghunahuna tungod lagi kay bata pa kaayo siya. Apan wala koy mahimo tungod kay siya man ang gipitik sa akong kasingkasing. Unsa may akong buhaton niini, Tita? Palihog pasabta ko. Daghang salamat.

* * *

Good day,

Sa wala pa nimo siya panguyabi nasayod ka nang daan sa iyang kinaiya ug nakaila ka na gyud kaniya. Nasayod ka na usab nga bata pa gyud siya. Apan nganong nanguyab man gyud ka niya kun sa imong tan-aw dili pa siya kasaligan. Nakaseguro ko nga wala gyu’y nipugos nimo aron manguyab kaniya. Labing maayo gyud nga sa tanan natong buhaton ato gyung hunahunaon sa makadaghan kun dili ba kita magproblema kun atong buhaton ang butang nga gusto natong buhaton, aron malikayan ang problema.

Apan kun love gyud kaayo nimo ang imong girlfriend saligi siya ug paningkamoti nga malipayon siya sa inyong relasyon aron dili na siya matental sa pagpangita og lain nga makahatag kaniya og kalipay. Bisan kun ingon pa lang niana ang iyang pangidaron kun diha kanimo malipayon siya dili na siya mangita pa og lain. Apan kun subra ka ka-estrikto, seloso ka ug mura og imo na siyang gisakal segurado ko mangita gyud siya og lain tungod kay dili man siya malipayon sa inyong relasyon.

Wala sa edad ang pagka-ligdong, Jabar. Kay dunay daghan nga bisan 30 plus na ang pangidaron apan wala lang gihapon siya masayod kun unsay angay buhaton sa ilang kinabuhi. Mogawas lang gihapon ang ilang pagka iresponsable ug pagkasalawayon. -- Tita Salie