Paggamit sa 4P’s program sa politika gidili sa DSWD

Ang Pangtawid Pamilya Pilipino Program (4P’s) nga gigahinan og salapi sa nasudnong kagamhanan  bisan tataw kaayo nga wala’y labot ang lokal nga kagamhanan apan dili gayod kalikayan nga gigamit kining isyu sa pipila ka mga kandidato sa miaging 2013 lokal election.

Nahimo kining gamiton nga isyu sa pagpasangil sa kaatbang nga mga kandidato nga ang katuyoan mao lamang gayod ang pagpahid og dili maayong imahen sa mga lokal nga opisyal nga gipasanginlan niini.

Dugang nga paggamit sa 4P’s program sa pipila ka mga kandidato mao ang paggamit usab niini sa pagdani sa mga botante pinaagi sa pagpasalig nga ipadayon ang maong programa kun hatagan og kahigayonan  nga magmadaugon sa iyang kandidatura.

Ang maong programa sa nasudnong kagamhanan daw namatikdan nga subli na usab kining gigamit nga mga isyu sa umaabot nga piniliay sa barangay nga dili lang paggamit nga isyu sa pagpasangil sa mahimong kaatbang nga kandidato o kaha sa pagdani usab sa mga tawo sa tuyo nga paluyohan ang kandidatura.

Si Arlene Lariba nga maoy 4P’s program coordinator sa DSWD 7 dihang nahinabi sa mga tigbalita hugtanong mipadangat og mga pahimangno batok niadtong mga kandidato nga mogamit sa maong programa.

Sa mao niyang pahimangno iyang giawhag ang si bisan kinsa nga nagbutang sa maong programa sa ilang campaign materials sa 4P’s program sa dili gayod pag-apud-apod niini ngadto sa mga tawo.

Dugang niyang pahimangno nga kun dili gayod maminaw ang maong mga kandidato sa umaabot nga barangay election sa paggamit sa 4P’s program sa nasudnong kagamhanan hayan nga mudangop sila sa buhatan sa Commision on Elections (Comelec) alang sa pagduso unya sa ilang reklamo.