Gamay’ng kalibutan

Gula 7

“Diane, dia kay bisita! Abi-abiha ni kay molakaw usa ko. Hiposon nako ang gitugway ko nga mga kanding para magkasultihanay mo’g maayo,” matud ni Ason nga nanaug sa balay.

Nagpasalamat si Ricky kang nang Ason. “Diane, makigsulti ko nimo,” matud ni Ricky. Taud-taud, migawas si Diane gikan sa kwarto nga wala magtingog ug klaro kaayo nga kahilakon.

“Miabot ka man dinhi sa Tabogon?” matud ni Diane. “Mibisita unta ko sa akong uyoan, kanang nagpuyo sa ibabaw, apan sulagma nga dinhi ko ikaw ikakita,” dali nga tubag ni Ricky.

Wala motubag si Diane. “Nakigpuyo ka diay og laing lalaki? Imo diay ko nga giilisan Diane?” sukna ni Ricky sa iyang kanhi puyo-puyo. “Pasayloa ko Rick. Nakasala g’yud ko nimo. Una mibiya ko nga walay klaro nga pagpananghid. Tumong unta nako nga makatabang nimo apan natintal ko,” ni Diane pa.

Nangagho si Ricky og lawom. Gitutokan niya si Diane nga mora’g wala makaantos sa pagtutok kaniya ni Ricky, miduko. “Salamat diay kaayo sa kwarta nga imong gipadala nako Diane. Ang tinuod, wala nako kini gastoha ug dia ra akong gitipigan ang tanan,” matud ni Ricky.

Nagsugod na sa pagtubod ang mga lusok sa luha sa mga mata ni Ricky. Mitindog si Ricky aron gakson si Diane. “Ayaw Rick, pasagdi na lang ko dinhi sa bukid, dili na ako angay kanimo kay mabudhion sa atong panumpa,” ni Diane.

Wala na gayud makapugong pa si Ricky sa paghilak ug wala siya magpapugong sa paggakus ni Diane nga misuway sa pagwakli kaniya. “Ayaw ako pugngi paggakus nimo Diane. Wala mahanaw ang akong dakung gugma kanimo bisan og nakigpuyo ka og laing lalaki.”

Naghinilakay silang duha si Ricky ug Diane. Pwerteng nakapangayo og pasaylo ni Diane kang Ricky samtang nagbakho. Gipasabot niya si Ricky nga tungod sa pagpaninguha nga makakwarta, misugot siya nga makigtibol sulod sa pribadong lawak ug didto siya napahimudsan ni Lito.

“Gawas ni Lito, wala nay laing lalaki nga natugyanan ko sa akong lawas. Dili tinuod ang pagduda sa uban nga usa ako ka babaye nga nagbaligya sa akong dungog,” pasabot ni Diane.

Nasabtan ni Ricky ang sitwasyon ni Diane. “Dugtongon nato pagbalik ang naputol nato nga kaagi sa gugma Diane. Karon, arang-arang na ang akong trabaho sa kompaniya nga akong nasudlan. Dili ka na gayud maglisud pa sa atong pagpuyo,” giingnan ni Ricky si Diane.

Miabut si nang Ason. Gitug-anan nila ni Ricky ug Diane si nang Ason sa ilang kaagi. “Ipananghid nako nimo nang Ason nga dad-on nako si Diane sa pagbalik nako sa siyudad,” matud ni Ricky.

Wala mosupak si nang Ason. Naggaksanay pag-usab sila si Ricky ug Diane. - Kataposan