Gamay’ng kalibutan

Gula 6

Buntag sayo nga midunggo sa pantalan sa Sugbo ang barko nga gisakyan ni Ricky. Una nga gipangita ni Ricky ang balay sa iyang ig-agaw nga nagpuyo sa Capitol Hills. Didto usa miestar si Ricky ug giswerte siya kay gitug-anan siya sa bana sa iyang ig-agaw nga nagkinahanglan sila og utility personnel sa opisina.

Tinabangan sa bana sa ig-agaw ni Ricky nakasulod dayon siya’g trabaho. Nalipay siya kay wala na mag-standby ug wala magasto ang iyang tinigum nga kwarta. Pagka Sabado nga wala’y trabaho gisuroy ni Ricky ang Sanciangko.

Gipangita ni Ricky ang giingon sa iyang amigo nga si Peter nga sa Wild Orchids Bar sa Sanciangko nga nakit-an niini si Diane. Tuod, nakit-an dayon ni Ricky ang mao nga bar. Naghinam-hinam na si Ricky nga ikakita na gayud niya si Diane.

Apan nasagmuyo siya sa iyang nasayran. “Wala na magtrabaho dinhi si Diane kay mora’g nakigpuyo-puyo man to sa iyang customer. Wala na kami masayud kun hain na siya kay wala na man mobalik,” matud sa floor manager.

Wala magdugay si Ricky sa bar. Human niya makita ang mga babaye nga magsayaw atubangan sa mga customer, nahuna-huna ni Ricky ang kapait nga nahiaguman ni Diane aron lang makapadala’g kwarta kaniya.

Apan ang wala niya masabti ngano nga miuban man kini og laing lalaki. Nanglabay ang mga buwan. Milabay ang usa ka tuig kapin ug nahimo na nga regular nga kawani si Ricky sa ilang kompaniya. Dili na usab siya utility.

Gipahimudsan ni Ricky ang iyang leave benefits. Mi-apply si Ricky og 10 ka adlaw nga leave kay nahukman niya nga mobisita sa balay sa iyang uyoan sa Tabogon. Takulahaw lang nga naputol ang paghanduraw ni Ricky kang Diane.

Diha pa si Ricky makamatngon nga luhaan na diay ang iyang mga mata tungod sa kagul-anan dihang gihandom niya ang mapait nga kagahapon uban ni Diane. Apan karon  anaa na duol kaniya si Diane.

Gilantaw pagbalik ni Ricky ang balay sa ubos nga iya ni Nang Ason nga maoy nahimong ugangan ni Diane. Byuda na si Diane human nga gipatay sa hantakan ang iyang puyo-puyo.

Nausab ang iyang huna-huna ug inay hapon siya moadto sa ilang Ason, karon na niya kini himoon. Nananghid si Ricky sa iyang uyoan nga molugsong sa ubos aron bisitahan si Diane.

“Maayo... maayong udto.... Nang Ason?”  sangpit ni Ricky. Migawas si Ason nga nagngisi kang Ricky. “Dayon dong. Saka lang,” matud ni Ason nga milingi sa sulod sa balay.

“Nang Ason, gusto unta ko nga makigsultihanay sa imong umagad nga si Diane. Wala motingog si Ason kay gibauran ra ba siya ni Diane nga dili magpabisita ni Ricky. (Sumpayan)