Gamay’ng kalibutan - Gula 3

Gitug-anan ni Ricky ang iyang uyoan nga nagduda siya nga ang umagad ni Nang Ason nga si Diane mao gayud ang iyang puyo-puyo kaniadto didto sa Mindanao.

“Mao ba dong? Apan sa dakbayan sa Sugbo man kana gikakita sa anak ni Ason ang iyang nahimong puyo-puyo nga sayo kaayo nga nabyuda,” matud sa tiyo ni Ricky.

Kataposang nasayran ni Ricky nga ang iyang puyo-puyo nga si Diane human mibiya kaniya didto sa Mindanao nakasulod isip dancer sa usa ka bar sa dakbayan sa Sugbo. Kini gani maoy rason nga mianhi si Ricky sa Sugbo ug matag Sabado gisuhid niya ang lainlaing bar apan wala niya igkita si Diane.

Human makakaon si Ricky, didto siya sa kayda sa balay sa iyang tiyo nga nag-umbaw sa ubos. Gilantaw ni Ricky ang balay ni Ason nga gipuy-an ni Diane. Nakahuna-huna si Ricky nga bisitahan niya si Diane inigka hapon.

Wala gayud siya masayop nga si Diane nga iyang puyo-puyo maoy iyang nakita kaganina. Gikulbaan gani kaayo siya nga nakit-an niya si Diane nga wala lang pangitaa. Ingon sa miniwang hinoon ang lawas ni Diane ug nasiplatan niya ang nawong niini nga mipiyahok na ang kanhi lamorok nga kaapingan.

Kalit lang nanumbalik sa kaisipan ni Ricky ang mga handurawan sa ilang kagahapon ni Diane didto sa Mindanao. Kaklase sila kaniadto sa pagtungha sa Mindanao State University ug didto miturok ang ilang gugma.

Gipiyong ni Ricky ang iyang mga mata. Gusto niya nga paspas ang pagkilab sa mga yugto sa malipayon nila nga kagahapon uban ni Diane. Lab-as pa sa panumdoman ni Ricky nga unang higayon nga naangkon niya si Diane atul nga nangaligo sila sa dagat.

Alang kang Ricky, pagkatam-is sa maong mga handumanan sa malipayong mga gusto nila ni Diane nga nagpabiling lab-as pa sa iyang panumdoman. Ang kaparaygon ni Diane panahon nga iya kining gaposon sa iyang mga bukton daw dili gayud malaksi sa kaisipan ni Ricky. Dihay higayon nga mihimo’g panumpa si Ricky kang Diane nga wala’y butang dinhi sa kalibutan nga makapuling sa iyang mga mata aron pagpadayon sa pagsud-ong sa iyang kaanyag.

“Mahalon ko ikaw sa tibuok ko nga kinabuhi Diane. Ikaw, makapasalig ka ba nako nga hangtod sa hangtud nga imo ko’ng mahalon?” matud ni Ricky usa ka higayon nga sila nanuroy si Diane sa daplin sa baybayon.

Wala motubag si Diane sa pangutana ni Ricky kaniya. Igo ra kini nga moparayeg pinaagi sa pagpauraray sa dughan ni Ricky. Nakahukom sila si Ricky ug Diane nga magtipon ug magpuyo nga magkinaugalingon.

Didto nga nasinati nila ang kapait sa kinabuhi nga wala na’y ginikanan. - Sumpayan