Gamay’ng kalibutan

Gula 2

Human matug-an sa hamtong-babaye ang ngalan ni Diane ngadto kang Ricky, mitindog ang batan-ong babaye ug midagan paingon sa duol nga balay. “Uy, Diane asa ka uy!” singgit sa hamtong-babaye. Gikulbaan kaayo si Ricky pagkadungog sa ngalan nga Diane nga gitug-an kaniya sa hamtong-babaye. “Ako diay si Ricky nang,” paila ni Ricky. “Tawga lang ko dong og Ason, pero Corazon g’yud ang akong ngalan.”

“Nang mora’g nakaila g’yud ko sa imong umagad. Sa syudad ba sila magkita ug ang imong anak?” sukit-sukit ni Ricky kang Ason. “Gikaila sa akong anak si Diane didto sa siyudad,” matud ni Ason.

“Kun mao kana, gamay ra g’yud diay kaayo ang kalibutan. Nagkatagbo ra gihapon ang among dalan ni Diane,” giingnan ni Ricky si Ason. Daw naglibog si Ason sa gisulti ni Ricky.

Iyang giingnan si Ason nga molahos usa siya sa balay sa iyang Tiyo Susing apan mobalik ra siya ug makigsulti siya ni Diane. Mipauli si Ason sa ilang balay ug nakita si Diane nga daw wala mahimutang.

“Ngano ba nga midagan ka man nga mora’g may gikahadlokan dihang gitug-anan ko si Ricky sa imong ngalan?” gipangutana ni Ason ang iyang umagad.

Wala dayon motingog si Diane. “Kaila ko niya Ma,” mubo nga tubag ni Diane. “Mao lagi, si Ricky mora’g nakahimungawong ‘sab sa imong panagway. Ngano diay Diane?” daw naikag si Ason nga masayud.

“Taas na kaayo ang sugilanon Ma,” matud ni Diane. Gitug-anan ni Ason ang umagad nga nagplano si Ricky nga mobisita aron magkasulti sila si Diane. “Ha? Balibari ma, ingna nga gihilantan ug dili makaatubang,” ni Diane nga daw nahadlok.

“Ngil-ad baya ang pagpamakak day. Ngano ba nga mahadlok ka man ni Ricky? Unsa ba’y rason nga mahadlok ka man niya?” subli nga pangutana ni Ason kang Diane.

Wala na motingog pa si Diane mao nga gibiyaan na lang ‘sab siya ni Ason.

Didto sa balay sa tiyo ni Ricky, nalipay kaayo ang uyoan sa ulitawo nga mibisita ang iyang pag-umangkon sa ilang dapit sa bukid. “Dugay na baya ko nga nagtrabaho sa Cebu City tiyo apan karon lang g’yud nakahigayon pagbisita dinhi sa inyo,” matud ni Ricky.

Gitug-anan ni Ricky ang uyoan nga gikaila niya si nang Ason kang kansang balay anaa ra sa ubos sa balay ni Susing. Iya usab nga gitug-anan ang uyoan nga nagduda siya nga ang umagad niini nga si Diane mao ang iyang puyo-puyo kaniadto didto sa Mindanao.

Nakalitan ang uyoan sa gitug-an kaniya sa iyang pag-umangkon. – Sumpayan