Gamay’ng kalibutan

Gula 1

Gikan sa karsada-nasyonal nga gikanaugan ni Ricky sa gisakyan niya nga bus, kapin na sa oras ang iyang paglakaw paingon sa bukid nga bahin nga gipuy-an sa iyang uyoan.

Gitawag og Barangay Kanaw-kanaw sa lungsod sa Tabogon ang gipuy-an sa uyoan ni Ricky tungod sa kahabog sa bukid nga nanganaw-kanaw ang kinaubsan.

Nakahukom si Ricky nga atul sulod sa usa ka semana nga pagbakasyon niya sa trabaho sa ilang kompaniya, adto siya magpalabay sa mga adlaw sa bukid nga halayo sa kagahub ug kasaba sa dakbayan.

Wala siya masayop sa iyang hukom nga kaadlawon pa siya nga mogikan sa dakbayan kay aron buntag pa tua na siya sa karsada nga kanauganan sa mga nagpuyo sa Barangay Kanaw-kanaw. Gipaningot na si Ricky apan wala gihapon siya mohunong paglakaw. Wala pa g’yud makabisita si Ricky sa balay sa iyang uyoan mao nga gitiman-an g’yud niya ang giingon sa iyang inahan.

Nahimutang sa tunga-tunga sa bukid ang balay sa iyang uyoan ug nag-umbaw kini sa usa ka mora’g pang-pang nga gilibotan sa pipila ka punoan sa kahoy’ng prutas.

Gilantaw na ni Ricky ang habog nga bungtod sa atbang sa iyang nahimutangan. Sa iyang pagtoo mao na gayud kini ang gipuy-an sa iyang uyoan nga si Susing. Gisubay niya kadtong gamay’ng dalan-dalan.

Nalantawan ni Ricky nga may balay sa unahan ug may duha ka babaye nga nangguna sa mga sagbot sa usa ka uma. “Kakapoy uy. Grabe ka tungason kining inyong lugar uy,” nagpadungog-dungog si Ricky ngadto sa duha ka nangguna sa mga sagbot nga milingi kaniya.

“Mangutana unta ko kun asa dapit ang balay ni Tiyo Susing?” matud ni Ricky. Gitudlo sa guwangon nga babaye ang balay nga nahimutang sa tungason pa og gamay nga gisalimbongan sa mga kahoy. Gitutokan ni Ricky ang kauban sa guwangon na nga babaye. Kalit kini nga miduko pagkakita kaniya ug daw gituyo nga dili magpakita sa iyang panagway. Nakahimungawong si Ricky sa panagway sa maong babaye.

“Naa karon sa iyang balay si Susing kay bag-o pa man kadto nga miagi dinhi gikan nga nagtugway sa iyang kabaw,” matud sa guwangon nga babaye. Wala mahimutang si Ricky. “Bisita ko dinhi sa inyong lugar nang. Unsa ba’y ngalan aning imong kauban? Imo ba siya’ng anak nang?”

Nagpabilin nga wala moyanghag ang kauban sa hamtong. “Ako kining umagad dong, bana sa akong anak apan nabyuda pagsayo kay gipatay sa hantakan ang iyang bana,” dali nga tubag sa hamtong-babaye.

“Unsay ngalan niya Manang?” pangutana ni Ricky. Nakabantay siya nga gisiko ang hamtong-babaye sa iyang umagad. “Diane ang iyang ngalan dong.”

“Ha? Diane?” nakalitan si Ricky. - Sumpayan