Pagsulay sa kinabuhi - Gula 6

Wala dayon makatulog si Terio nianang gabhiona. Nahuna-huna niya kadtong pag-alam-alam ni Cynthia kaniya dihang pwerte niya nga nakabakho nga naghuna-huna nga wala na g’yud siya tagda pa ni Bella.

Kalit mibathaw sa huna-huna sa batan-ong engineer kadtong gisulti ni Cynthia kaniya nga dili magpalabi sa iyang gibati kay kun mapakyas siya sa gugma ni Bella, daghan pa nga mga babaye ang mahigugma kaniya.

Daw gisukna ni Terio ang iyang kaugalingon kun may pagbati ba kaha si Cynthia kaniya. Bisan og nakasabot siya nga paraygon si Cynthia kaniya, apan basin og tungod lang kini sa kasuod nila kay kauban sila sa trabaho.

Nahuna-hunaan ni Terio nga tumanon ang gisulti kaniya ni Cynthia. Gikab-ot ni Terio ang selpon diha sa lamesa, dayon iya kining gipindot-pindot.

“Tinuod kaha nga makakita pa ko’g laing buotang girlfriend gawas ni Bella?” Gi-send ni Terio ang maong mensahe sa selpon ni Cynthia. Wala dangti’g dugay, nakadawat siya’g reply.

“Kaayo. Kakita ka pa’g daghang babaye nga mopangga nimo... usa na ko nila. Hehehehe.” Nakapahiyom si Terio.

Gibawsan ni Terio si Cynthia. “Dugay ra ko nga naibog nimo Cynth, apan nagpugong lang ko kay matinud-anon man gud ko sa akong girlfriend, gusto nako nga usa ra g’yud. Pero karon I hope nga di ko nimo pakyason.”

Wala na makadawat og reply si Terio gikan ni Cynthia. Nagtuo siya nga nasuko ni sa iyang pagpanguyab nga gipaagi sa selpon. Pagkaugma sa buntag, miadto si Terio sa ilang opisina apan dili sa pagtrabaho, kun dili pag-file sa iyang emergency leave.

Gusto niya nga makalarga dayon siya pauli sa Mindanao inigkagabii. Nasiklapan niya si Cynthia didto sa iyang lamesa nga mipahiyom og hilaw dihang nakatagbo ang ilang panan-aw.

Gidaug si Terio sa kauwaw ug wala na lang moduol ni Cynthia. Nagtuo siya nga nasuko ni kaniya kay wala na man motubag sa iyang kataposang text kagabii.

Milukat og tiket sa barko si Terio. Pagbalik ni Terio sa balay sa iyang maguwang nasugatan niya ang amiga niya nga babaye nga suod usab ni Bella. Iya kining gitug-anan sa iyang plano nga mopauli sa Mindanao. Pagkagabii, didto na sa pantalan si Terio. Wala na siya ihatud pa sa iyang maguwang-babaye. Nagdibal ang wala masabti nga pagbati ni Terio. Haw-ang kaayo ang iyang gibati niining pagbiya niya sa Sugbo.

Himuon niya kini aron makalimtan niya si Bella, apan mora’g wala usab siya mahimutang kay nagtuo siya nga nasuko kaniya si Cynthia nga gipanguyaban  niya pinaagi sa selpon kagabii.

Hapit na mogikan ang barko. Unya, kalit lang miabot si Bella. “Salamat, nakit-an na g’yud tika. Ayaw ko’g biyai Ter, malooy ka,” ni Bella pa nga naghilak. - Sumpayan