Pagsulay sa kinabuhi - Gula 4

“Pangita’g laing babaye nga ikapuli nimo ni Bella. Pailha siya Terio nga makakita ka pa’g lain nga mas labaw pa kaniya,” pintok kaayo ang tingog sa maguwang-babaye nga daw nalooy na sa iyang igsoon nga gibaliwala na lang ni Bella.

Wala magtingog si Terio. Taliwala sa kahaw-ang sa kinabuhi nga wala na tagda ni Bella, gibuhos ni Terio ang iyang kaugalingon sa pagtoon. Duna g’yud hinoo’y mga gabii nga mokalit lang siya paghilak nga maghandum sa iyang kaagi uban ni Bella.

Hangtud nga nahuman g’yud ni Terio ang iyang kurso ug wala siya magdahum nga siya ang nanghawod sa ilang klase. Sagol kalipay ug kahaw-ang ang iyang gibati. Naghandum siya nga malipay g’yud unta siya kun apil pa si Bella nga mitaud sa iyang medalya.

Natunog sa ilang lugar nga si Terio nahimong Magna Cum Laude sa ilang klase. Milabay pa ang mga adlaw, semana ug buwan sa kamasulob-on ni Terio. Aron makalimot sa iyang kagul-anan, gibuhos na usab niya ang iyang panahon sa pagbasa pagbalik sa iyang mga libro.

Mi-take siya og Board Examination alang sa mga engineers. Miabag gayud kang Terio ang kapalaran. Nakapasar siya isip lisensyado na nga engineer. Gihatagan siya’g gamay’ng salo-salo sa iyang maguwang-babaye.

Pinaagi sa amiga niya nga babaye, gipadapit niya si Bella nga motambong unta apan mibalibad ang iyang girlfriend. “Nasabut nako Ter nga may gusto pa kanimo si Bella apan nahadlok lang g’yud sa iyang mga ginikanan. Katambungon g’yud unta to apan mahadlok lang,” matud sa ilang higala.

Daghan g’yud nga mga higayon nga naninguha si Terio nga madugtong pagbalik ang naputol nila nga relasyon  ni Bella apan wala gayud siya mulampos.

Dunay mga higayon nga gikahinagbo ni Terio ang mga ginikanan ni Bella ug nasabtan niya nga nagpabilin ang grabeng kasuko niini ngadto kaniya. Isog kaayo kini og tinan-awan.

Nakasulod og trabaho si Terio sa usa ka dakung construction company dinhi sa Sugbo. Isip batan-ong engineer, daghang mga babaye nga kauban niya sa trabaho ang nag-ibid-ibid kaniya apan wala gayud matintal si Terio kanila.

Usa ka higayon, nagkasabot ang mga kauban sa trabaho ni Terio nga mangaon sila sa gawas. Wala makabalibad si Terio sa pag-uban sa grupo. Wala damha nga gikahinagbo niya si Bella ug ang iyang mga ginikanan didto sa kan-anan.

Gusto g’yud unta niya nga tagdon si Bella apan diha ang mga ginikanan niini. Nakabantay ‘sab siya nga bisan ang pagpasiklap kaniya, gilikayan kini ni Bella.

Imbis malipay si Terio, kasubo hinoon ang mihakup kaniya sa maong higayon. - Sumpayan