Ang kutsero ug ang kahibulongang estudyante

Alas 12:00 tungang gabii, nag-brown out tibuok dakbayan sa Sugbo atol sa strike sa tanang pasaheroang sakyanan. Ang aklas nagsugod alas 5:00 sa hapon ug daghang mga sumasakay ang natanggong labi na sa mga estudyante. Way laing nagtikawtikaw niadtong higayona gawas sa tartanilya nga way labot sa aklas.

“Mambaling, Basak, Kinasang-an....!” Nagpanawag ang kutsero samtang nagsubay sa dalan C. Padilla paingon sa Inayawan. May mipara nga estudyante nga puti ang sinina, taas ang buhok, ug nagbitbit sa libro.

“Sa Tagunol ta, Noy...!” Matud pa sa estudyante.

“Di ko, ‘Day, kay ngitngit didto....!” Balibad sa kutsero.

“Lakturanan bitaw ‘na sa Inayawan. Sige na, Noy, malooy ka...!” Pinugos nga hangyo sa estudyante. Nanaug sa iyang tartanilya ang kutsero ug may gihunghong sa estudyante.

“Bastos ka, ‘Noy..! Tawo ra ang makahimo ‘ana oy...!” Nagkanayon ang estudyante dungan ang pagsakay sa tartanilya agi’g pagsugot sa gihunghong kaniya. Mipadayugdog padagan sa iyang kabayo ang kutsero ug pagliko sa may ngitngit ug awaaw nga dalan sa Tagunol  kalit nga nangutot ang iyang kabayo. Gikuyawan ang estudyante. Mihunong daplin sa dalan ang tartanilya ug milingi sa estudyante ang kutsero nga naghinamhinam. Gi-ismiringhoy ang estudyante nga wa lang sab mobalibad sumala sa ilang kasabutan...!

Padayon nga mipadagan sa iyang kabayo ang kutsero apan pila lang ka lakang ang gidaganan nangutot na sab ang kabayo. Mao nga milingi na sab ang kutsero sa estudyante nga nagpahinumdum sa ilang kasabutan.

“Hinayhinay lang Noy, wa bitaw ta magdali...!” Pahinumdum sa estudyante ngadto sa kutsero. Pagkahuman, mipadagan na sab sa iyang kabayo ang kutsero. Kadaghan na mangutot ang kabayo ug ingon sa wa lang manumbaling ang kutsero.

“Sige na Noy...! Kadaghan na mangutot ang imong kabayo...!” Gikablit sa kilid ang kutsero.

“Di na ko...! Bahala na’g kaigit ang akong kabayo....!” Mibalibad ang kutsero. Wa lang sab mamugos ang estudyante nga mipiyong ang mga mata kay katulgon. Unya, kalit misiga ang suga sa kadalanan samtang nagdagan ang tartanilya. Nakita sa kutsero nga sa unahan may krus nga gilibutan sa nagpirat nga siga sa kandila. Gilingi sa kutsero ang estudyante ug wa siya’y nakitang pasahero.

Didto sa nagpirat nga siga sa kandila, nakita niya ang estudyante atubangan sa krus. Naghilak. Ug sa kalagnong daghang ug hilak, mihugong pagdagan ang kabayo. Pag-abot sa hayag nga kapilya sa balangay, may mga tawo nga nagtukaw sa lungon. Mihunong ug nanaug ang kutsero sa tartanilya. Miduol sa lungon nga may retrato sa babaye ibabaw niini.

Nangurog ang iyang kalawasan nga mibalik sa iyang tartanilya ug nangutana sa iyang kaugalingon: “Siya ba kadto ang akong gi-ismiringhoy ganina?”

Gitubag sa bugnawong hoyohoy ang pangutana sa kutsero uban sa angtud nga baho sa kandila. Sa unahan, nakita na sa kutsero ang hayag nga merkado sa Inayawan. (Katapusan)