Pagsulay sa kinabuhi

Gula 2

Gihatud ni Terio si Bella apan kutob ra siya sa atubangan sa balay sa dalaga. Mahadlok siya nga makit-an sa mga ginikanan ni Bella ug musamot nga masuko kini kaniya.

“Sige na mosulod na ko,” matud ni Bella nga daw nagdali. Nakasabot si Terio nga nahadlok si Bella nga masakpan sa iyang mga ginikanan nga nagkuyog sila. Mipauli si Terio sa balay sa iyang maguwang nga nahimutang dili layo sa balay nila ni Bella.

Gisugat siya sa iyang maguwang. “Unsa kining nadunggan nako nga tabi-tabi nga mimabdos si Bella ug ikaw kuno ang nakapamabdos? Nasuko ra ba kuno pag-ayo ang amahan ni Bella nimo,” matud sa maguwang-babaye ni Terio.

Wala dayon makatingog si Terio. Nakalitan siya sa gisulti sa iyang maguwang-babaye. Dugay’ng nakatulog si Terio, naghinuktok siya. Pagkaugma nagpaantaw siya sa balay nila ni Bella. Gusto siya nga magkita na usab sila.

Apan wala niya igkita si Bella. Milabay ang mga adlaw nga wala na makakita si Terio sa iyang girlfriend. Usa ka hapon gisultihan si Terio sa iyang maguwang-babaye nga wala na pagawasa sa balay si Bella.

Nangita’g paagi si Terio nga magkakita sila si Bella apan napakyas siya. Dili na kini makontak sa iyang contact numbers. Milabay ang daghan pa nga mga adlaw.

Gihakop sa tumang kasubo si Terio kay gimingaw na siya kaayo ni Bella. Usa ka buntag, nakita niya si Bella nga migawas sa ilang balay apan diha uban kaniya ang iyang mga ginikanan. Nasabtan niya nga manglakaw sila.

Dihang misulod pagbalik sa lagwerta sa panimalay ang amahan ug inahan ni Bella midali siya paggawas ug gisitsitan niya ang dalaga. Mitan-aw kini kaniya apan midali sa paglingiw, ingon sa milikay nga magkatagbo ang ilang panan-aw.

Mibalik paggawas ang amahan ug inahan ni Bella ug nagkuyog sila pagpanglakaw paingon sa eskena. Miagi sila atubangan sa balay sa maguwang ni Terio apan wala molingi ang tulo. Hapon na nga nahibalik sila si Bella ug ang iyang mga ginikanan. Nagtaksi kini ug diritso nga misulod sa lagwerta sa panimalay sa dalaga. Mora’g dunay gitagoan.

Milabay ang mga adlaw nga wala na sila magkakita si Bella. Usa ka adlaw, may nakatug-an ni Terio nga suod nila ni Bella nga gipakuha diay sa mga ginikanan sa dalaga ang gimabdos sa ilang anak.

Takulahaw lang nga nakahilak si Terio pagkasayud niini. Gusto niya nga makita si Bella. “Nakabantay ka nga dihay higayon nga gikan sila nga nanglakaw ug nagtaksi pagbalik ug gipasulod sa lagwerta ang taksi? Luya kaayo niadto si Bella,” saysay sa ilang amiga. -- Sumpayan