Talisay City basketball mayor’s cup hanap?

Usa ka basketball team manager (ngan gipungan) sa tinuig nga Talisay City Basketball Mayor’s Cup mipahungaw sa iyang kadismaya dihang namatikdan nilang mga Talisaynon, kinsa hilig sa dulang basketball, nga hangtod ning pagsulat, wala lang magpakabana ang ilang mayor nga si Johnny V. delos Reyes sa pagpanindot bisan diyotay man lang sa ilang Talisay City Sports Complex agi’g pasiunang pagpangandam alang sa ilang umaabot nga kapistahan ning umaabot Oktubre 14-15.

Ang rason nganong ingon sa wala lang maghatag og importansiya niini ang ilang bag-ong mayor, kini tungod kay wala kunoy pundo ang Talisay City alang sa maong kalihokan.

Nakomparar man gud sa mga lumolupyo sa Talisay City ang kaaktibo kanhi sa nangaging mga mayor batok sa gipakitang lihok ning bag-ong namunoan sa ilang siyudad. Kaniadto gud, matud pa sa tinubdan ning impormasyon, sa bulan pa lang sa Agosto sugdan na sa ilang nangaging mayor ang pagtsek-ap sa ilang Sports Complex kun wala bay mga guba niini nga ayohonon, o unsa bay maayong ipuno niini nga makapaambong pagsamot sa maong dapit-kalingawan, diin ang pagbuhat sa ingon makapahinumdom nilang tanan nga ang kasaulogan sa piyesta sa ilang patron, Sta. Theresa de Avila hapit na usab moabot.

“Apan karon, mingaw pa sa tirana. Wa gyu’y kisaw!” Dugang pa sa maong Talisaynon, kinsa mihangyong dili lang ibutyag iyang ngalan.

Hinuon may usa pa ka bulan ang gilay-on sa dili pa magpiyesta ang ilang siyudad. May igo pang higayon nga ipakita ni JVR nga sayop ang gituhoan sa iyang mga tawo, kinsa nagtuo nga wala lang siya magpakabana. Kana kun iyang paningkamotan nga kun unsa man ang mga maayong binuhatan niadtong iyang gipulihang mayor, diin maoy nakalipay  sa katawhan, kinahanglang iyang ipadayon!

Dakong hagit kini ni JVR unsaon niya pagpanikaysikay aron maangkon niya pagbalik ang kasingkasing sa mga Talisaynon nga miaksiyon na sa pagpangluod ning mga adlaw nga anaa pa siya sa period of adjustment sa iyang pagpangatungdanan.

Talisaynons, hangyo lang. Give JVR a chance to prepare. And to JVR, take the best of this chance...by proving to the people that they were not wrong to cast their votes in your favor.