Pagsulay sa kinabuhi

Gula 1

Halos moluhod na lang si Bella ngadto kang Terio aron dili siya talikdan sa ulitawo human sa taud-taud nga panahon sa iyang pagpaantos niini. Hapit na molarga ang barko nga sakyan ni Terio paingon sa Mindanao.

“Malooy ka Ter, ipadayon nato ang atong pagminahalay,” walay kukauwaw si Bella nga mipatulo sa iyang mga luha bisan og gitan-aw siya sa ubang mga pasahero sa barko.

Dili matukib sa pulong ang gidak-on sa paghigugma ug pagmahal ni Terio kang Bella. Nagkahigugmaay sila’ng duha samtang si Terio nagpuyo sa balay sa iyang maguwang sa Barangay Apas. Nagtungha si Terio dinhi sa dakbayan.

Usa ka gabii atul sa ilang pagpanuroy kaniadto sa daw naparot nga bukid nga karon gitawag na og Grotto, natintal sila sa usa’g-usa tungod sa wala’y pugong-pugong nga pagparayganay.

Wala pa’y mga balay nga gitukod kaniadto sa mao nga lugar ug panahon sa kagabhion hilabihan na kamingaw sa mao nga dapit. Didto’ng lugara nga naangkon ni Terio ang kaputli ni Bella.

Halos kaduha sa usa ka semana nga sum-ukon nila ang maong lugar ug taliwala niadtong pino kaayo nga mga sagbot nga bermoda aron subli-sublion nila ang pagtagay sa dugos sa pagminahalay.

Adto sila mangyaka niadtong mga pino kaayo nga sagbot nga bermoda nga daw gituyo sa pagtanom para kanilang duha. Apan may kinutoban ang ilang kamalipayon dihang mibunga na ang gihimo.

“Mabdos na baya ko Ter, wala na ko mag-mens sa miaging buwan ug nagsuka-suka ko mao nga nasakpan ko nilang Papa ug Mama,” masulob-on ang tingog ni Bella.

Kakulba ug kalipay ang gibati ni Terio. Ang tinuod wala siya mahadlok nga mamunga ang ilang kinawat-kawat nga kalipay kay andam siya nga mangasawa ni Bella.

Giparaygan ni Terio si Bella ug niadtong higayona gitagay na usab nila sa makausa pa ang dugos sa matam-is nga pagmahalay. “Dili gayud kita magbuwag ha Bell ha?” giingnan ni Terio ang iyang girlfriend. Wala motingog si Bella ug igo lang nanghupaw.

Gitug-anan ni Bella ang iyang boyfriend nga gusto sa iyang mga ginikanan nga palikayan siya. “Gusto nila nga ipakuha ang akong gisabak kay makadaut kini sa akong pagtungha,” matud ni Bella.

“Unsa? Ayaw kana og buhata Bell!” misinta og gamay ang tingog ni Terio. Mihilak si Bella nga daw wala masayud unsay iyang buhaton.

Giam-aman siya ni Terio. “Tana, mamauli na ta kay pangitaon na ‘sab ko karon nila’ng Papa ug Mama. Kasab-an na ‘sab ko karon,” matud ni Bella nga nagpamahid sa iyang mga luha. - Sumpayan