In-Love

Gula 6

Pagka buntag, diha pa masuta ni Avel nga nakatulog na diay siya kagabii ug wala na siya makabantay nga mi-text pa kaniya si Welyn. Kaduha g’yud mi-text si Welyn nga wala na matubag ni Avel.

Nahauknol si Avel pagkabasa niya sa text message. “Ambot nganong gimingaw ko nimo Vel? Dili man unta tika uyab.” Nagtoo si Avel nga gibinuangan ra siya ni Welyn abi kay nakagusto man siya kaniya.

Gibasa niya ang ikaduha nga message. “Day off nako ugma Vel, makaari ka sa apartment kay andaman tika og lami nga sud-an kay mao ra g’yuy akong ikabawos sa imong kaayo nako,” ni Welyn pa.

Nalipay si Avel apan Sabado karon ug nagkasabot ra ba sila ug ang iyang mga barkada nga mangaligo sa dagat. Wala masayud si Avel kun unsay iyang buhaton.

Gitimbang-timbang ni Avel nga kun makig-uban siya sa iyang mga barkada, malingaw g’yud kaayo siya apan ikalipay usab niya pag-ayo kun si Welyn maoy iyang ikauban.

Mi-ring ang usa ka selpon ni Avel. Ang suod niya nga barkada maoy nanawag ug nagpahinumdom sa ilang pangaligo sa dagat. Gitangdo ra ni Avel ang iyang higala.

Apan pagka taud-taud, mitawag kang Avel si Welyn. Mora’g may dala nga pagmahay ang tingog kay wala siya gitubag sa duha niya ka text message kagabii.

Pwerteng nakapasabot ni Avel nga nakatulog na siya mao nga wala na makatubag. “Ayaw ko’g balibari ha, ari g’yud ta mag-lunch kay mag-andam ko’g atong makaon,” matud sa paraygong tingog ni Welyn.

Nakahinumdom si Avel nga gitangdo ra ba niya ang iyang higala nga moadto siya sa ilang pangaligo sa dagat. Apan nahadlok usab si Avel nga tingali’g mahiubos kaniya si Welyn kun dili niya adtoon. Kalit lang misantop sa iyang huna-huna ang message ni Welyn gabii nga miingon nga na-miss kini kaniya. Tuod, nakahuna-huna si Avel nga imbitahon niya si Welyn nga moapas sa ilang mga kauban nga mangaligo sa dagat.

Karon, nausa na ang iyang huna-huna. Moadto siya sa gipuy-an ni Welyn unya moapas sila sa iyang mga amigo. Tabla pa nga duha’y igo kay walay mahiubos nila ni Welyn ug sa iyang mga barkada.

Wala na lang mag-breakfast si Avel, nagpalit na lang siya og biscuit kay para dili siya magtimi-timi sa pagkaon kun mag-uban na sila si Welyn. Nahuna-huna ni Avel nga bahala na og masuko kaniya si Welyn, suknaon niya kini kun may swerte ba siya sa iyang gugma sa dalaga.

Naligo si Avel ug dayon giandam niya ang kinaham niya nga T-shirt ug karsones-maong. - Sumpayan