In-Love - Gula 3

Milabay ang mga adlaw, nakadawat og text message si Avel gikan kang Welyn. Nananghid kini nga motawag kang Avel. Taud-taud mitawag g’yud tuod ang gwapa nga dalaga kang Avel.

“Vel, may problema na ‘sab ko kay lain kaayo og inandaran ang akong sakyanan. Ikaw ra g’yud ang akong nahuna-hunaan kay basin og makatabang ka nako,” matud ni Welyn.

Gitug-anan ni Welyn si Avel nga tua ra sa iyang giabtan nga balay ang kotse kay mahadlok siya nga mopadagan niini. Nahuna-hunaan ni Avel nga iya gihapon nga tabangan si Welyn.

Misakay siya sa iyang kotse ug miadto sa Barangay Cogon-Ramos nga maoy nahimutangan sa balay nga gipuy-an ni Welyn. Gisugat si Avel ni Welyn pag-abot niini sa atbang sa Ramos Super market. Nakatimaan si Avel sa kotse ni Welyn nga diha ra giparada atubangan sa usa ka kinoral nga balay. “Salamat kaayo Vel ha. Nahago ka g’yud hinoon pero wala man gud ko’y kaila nga makamao motan-aw og makina,” ni Welyn.

Wala masayup si Welyn kay si Avel nakatungha og kurso nga Automotive Mechanic sa Concord Technical Institute. Bisan og maantigo si Avel sa makina apan wala siya motrabaho sa iyang kurso pagka mekaniko.

Nagtrabaho si Avel isip supervisor sa ilang kompaniya. “Suwayan lang nato Lyn kun makaya ba nako pag-ayo sa imong kotse,” ni Avel pa. Gipaandar niya ang makina sa kotse ni Welyn.

Dali ra kaayo nga nasabtan ni Avel ang depekto kun ngano nga saba ang makina inig-andar. Gitangtang ni Avel ang water pump sa makina ug gipakita kang Welyn ang gitaya na nga sud niini.

“Kini maoy guba Lyn kay tan-awa, dili na hapit mutoyok, mistak-ap na hapit,” gipakita ni Avel ngadto sa dalaga ang tinangtang nga pyesa sa sakyanan.

“Pwede og ikaw la’y palit sa pyesa Vel kay dili g’yud ko makamao niana,” matud ni Welyn.  Wala magduha-duha sa pagtangdo si Avel. Gitunolan siya’g kwarta ni Welyn.

“Ubani na lang hinoon ko Lyn, gamiton na lang nako ang akong kotse pagpalit og pyesa,” matud ni Avel. “Daku g’yud ko’g obligasyon nimo Vel da kay hasta ang imong kotse magamit pa,” ni Welyn.

Sa hilom gikalipay ni Avel nga nagkakuyog ug nagkasuod sila si Welyn. Kun dili pa si Welyn ang mihangyo kaniya, dili gayud siya mangunay sa pag-ayo sa kotse sa dalaga.

Kun ang kotse ni Avel maguba idangop man gani kini niya og mekaniko ug dili siya mangunay sa pag-ayo.

Hapon na mahuman ni Avel pag-ayo ang kotse ni Welyn. “Dali panghunaw usa kay buling kaayo ang imong mga kamot,” giagni si Avel ni Welyn nga mosulod sa iyang gipuy-an nga balay aron manghunaw. - Sumpayan