Pork barrel, aypag ibayad sa atong utang

Ingon sila, pobre kaayo ang Pilipinas. Dako kuno’g utang sa gawas. Unya, nganong naka-afford man lagi ang Senado ug Kongreso sa pagpangawat og P10B gikan sa bulsa sa atong gobiyerno? Kining kantidara, sa nabulgar lang, ha? Wala pa kini labot sa gitago ug sa nakalusot nga wala pa ipiyait. Sa ato pa, daghan diay’g kuwarta ang Pilipinas. Dili diay pobre!

Hunahunaa lang. Pipila na ba ka lider sa atong nasud ang giimbestigahan sa Senado ug Kongreso gumikan sa kasong plunder ug sa malversation of public funds, diin bilyonbilyon ka pesos nga kantidad ang ilang gihilabtan aron mabalhin sa ilang personal nga panudlanan?

Kun ang dinagkong pagpangawkaw didto magsugod sa administrasyon ni anhing kanhi Pamuno Ferdinand E. Marcos, diin abi nato mahunong na pagbuto sa Unang Edsa Revolution, apan nasayop diay ta, kay bisan ning panahon ni PNoy nagpadayon lang diay gihapon, diin misamot pa ka-grabe ang sinalbahis nga matang  sa pagpangawat, atong makuwenta unsa kabuhong diay sa salapi ang Pilipinas. Gipulipulihan lang gyud sa pagpahimulos sa mga wala’y kasingkasing nga politiko ang inosente tang panudlanan! Hinungdan, nga nalumos ta sa dakong utang.

Ginaingon, nga kun unsa kuno ang punoan, mao usab ang mga bunga. Kun ang punoan mangga, dili gyud mahitabo nga mamunga kini’g kaymito o durian. Ug kay ang punoan usa ra, kun unsa man ang matang sa taste sa usa ka bunga, mao ra usab kini ang taste sa tanan.

Ug mao kini ang nahitabo sa atong balay-balauranan. Usa ra ka punoan ang pandayan sa atong balaud apan adunay duha ka sanga. Ang Kongreso ug ang Senado. Ilang mga bunga nagagikan lamang sa usa ka punoan. Ug ning pagsiak sa balita sa P10B pork barrel scam didto sa Senado, diin natilawan natong Pinoy ang kaaslom ug kahalang sa pipila ka mga bunga kang kansang unod nabuksan sa usa ka whistleblower, kinsa nagbulgar sa dautang binuhatan sa mga Kongresista ug Senadores, ang atong panan-aw kanilang tanang magbabalaud diha sa Senado ug Kongreso, usa ra. Sama sa uban nilang kaubanan nga naablihan na ang tinuod nga unod, sila pulos mga aslom ug halang sab! Ug wala nay laing mapili!

Ning paghukom ni PNoy nga wagtangon na ang Pork Barrel, maypag ang tibuok budget nga alang ning maong programa, ihurot og bayad sa atong tinrilyon ka dolyares nga utang nato sa gawas. Total, naanad na man ang katawhan nga wala’y tarong karsada, wala’y tarong kaon, wala’y tarong kapuy-an ug wala’y tarong kapanginabuhian. Kay ang mga proyekto nga alang unta sa kaayohan sa tanan, sagad pulos man lang diay ghost projects, diin ang binilyong kuwarta na-release na, apan ang proyekto drowing ra! Paita, sa?

Mr. President, wala na kami sali’g sa kredibilidad sa mga politiko dinhi sa Pilipinas. Bisa’g kinsay imong paguniton anang kuwartaha, tsipohon lang gihapon na. Busa, maayo pag ideretso na lang gyud nag bayad tanan sa atong utang hangtod sa pagka-impas! At least, wa nay makawat ang mga kiriwan.