Nasawo ang dimalas

Kaslonon si Tonyo, kang Utyang. Gikatakda na ang petsa sa ilang kasal, ning ilang dakong simbahan sa lungsod sa San Fernando. Kanunay mahinumdoman ni Tonyo, ang larawan ni Utyang, samtang siya magdaro, ning iya karong baol nga kabilin pa sa naanhing niyang ginikanan.

“Wa nay sama kamalipayon nga akong bation Tonyo, nga kita magkadayon!” hupong sa kaparaygon ang panuni sa sinultihan ni Utyang kaniya.

Baligho sa panahon mausabon, kay sa miaging gabii, nga nahiduaw siya sa pinuy-anan sa iyang pangasaw-onon, mao may iyang naabtan, nga hilabihan nga nakahawok si Goyong kang Utyang nga sa iyang tan-aw hilabihan nga gipaukob ni Utyang ang iyang ngabil.

“Ayaw kahibulong Tonyo, sa imong nakita? Imbis ikaw ang akong pakaslan ... nausab ang akong hunahuna, nga wa ko diay ikaw higugmaa!” gidaygan siya ni Utyang.

“Dimalas sa tanang dimalas ang nahitabo kanimo Tonyo, nga dili modayon pagpakasal kanimo si Utyang, sa bugtong katarongan nga wa ka diay niya higugmaa!” ingon sa nagkantalita kaniya si  Goyong.

“Alang kanako Tonyo ... ikaw ang pinakadimalas nga lalaki, dinhi sa kalibutan ug ako ang gidibuynas!”

Hapit dili matugkad ang duha ka tiil ni Tonyo, nga nanaug sa pinuy-anan ni Utyang. Ingon sa nahunlak ang tanan niyang gibati. Way hunong ang kasubsob sa iyang binakhoan. Mihilak siya ug midangoyngoy.

Wa kini malilong sa kinatibuk-an nilang silingan ning ilang balangay sa Pitalo, nga napalpak ang gikatakda unta nilang kasal, kay si Goyong na man hinuon ang giminyoan ni Utyang.

Hapon kadto sa adlaw’ng Biyernes. Usa ka bulan nga milabay, sukad gikasal si Goyong ngadto kang Utyang. Nasugatan sa may simangan nga dalan si Goyong, nga hilabihan nakahugong og dagan. Nangluspad ang wait.

Gipangutana kini ni Tonyo nga nagkanayon.

“Unsa hitaboa Goyong, nga hilabihan man nimo nga nakadagan?”

Igo lamang siya gitubag nga nagkanayon:

“Gigukod ko ni Utyang kay buot ako niya patyon og sundang!”

Igo lamang mihagawhaw si Tonyo nga nagkanayon:

“Pagbuot gihapon sa kahitas-an ... nga nasawo ang dimalas!” (Kataposan)