Jezreel N. Buot

Alas singko i medya sa hapon. Medyo kilumkilom na. Maoy paggawas ni Fe, nagtungha sa grade two, sa iyang room. Kasagaran, alas singko ilang pamuhi. Duna tingale importanteng gisulti ilang magtutudlo. Naghulat lang si Zaldy, lolo ni Fe, nga nahimong drayber, sa apo, hatud kuha sa eskuylahan. Nisakay si Fe sa Mitsubishi Adventure nga nag-parking sa basement sa eskuylahan. Luyo sa front seat siya nipahimutang.

Kay sa front seat, naa iyang Lola Almira naglingkod. Di man gyud magbuwag iyang lolo ug lola. CPA iyang lolo ug sekretarya niya iyang lola. May opisina sila sa barangay Calamba ning dakbayan. Inig padulong nilas opisina nila kada adlaw, ihapit nila si Fe sa Masabon Learning Center. Ug mahapon, sayo silang manggawas sa opisina. Alas kuwatro i media, aron mahapit sab nila ilang apo.

Way tan-aw-tan-aw si Zaldy nga nipaatras kay nagsalig nga katapusang nag-parking iyang sakyanang gimaneho. Unya ... “Bog!” May nipaka sa iyang luyo. Dayon, may nibusina sa luyo paghumas paka.

“Hala!” ni Zaldy.

“Oy!” ni Almira.

“Naa man tay naatrasan!” dugang niya.

Gipatay ni Zaldy ang makina sa sakyanan. Ug nanaug siya. Nanaug sab si Almira.

Nakabundol ang bumper sa luyo sa Adventure, sa atubangan nga bumper sa Toyota Corolla nga maron. Nanaug ang drayber nga babaye sa iyang kotse.

“Sorry kaayo Misis nga naatrasan ka. Nganong naa man sab ka diha nag-parking sa akong luyo? Agianan man gyud nako inig atras?” ni Zaldy.

Nahinumdum siya ining kotseha. Nag-parking ni tupad sa Adventure sa walang habig. Naghulat  sab og pupil sa eskuylahan. Unya diyes minutos ang nakalabay, nag-una’g abot ang lalaki nga pupil. Nisakay sa kotse. Unya nipaatras dayon ang kotse. Ang pagtoo ni Zaldy nga nigawas na sa basement parking area ang kotse. Karon, nia ra diay sa iyang luyo.

Usa ka dangaw ang garas sa bumper sa kotse. Napakpak ang pintal. “Nagbasa pa man ko sa assignment sa akong anak” tubag sa babaye nga drayber sa kotse. “Nahala, aduha man tang nagdanghag, tunga lang ta sa danyos sa imong kotse. Wa may damage akong bumper sa luyo kay puthaw man ni. Imo plastic man” ni Zaldy sa malumong tono. “Nganong tunga man? Dapat solo nimong bayranan. Kay ikaw may nakadasmag” sa babaye. Niisa ang kilay ni Almira.

“Pila na man ka katuig nagdrayeb misis?” ni Almira.

“Sobra lima ka tuig na” sa babaye.

“Kining akong bana,15 ka tuig na. Karon pa siya nakadisgrasya. Ug kining disgrasyaha, dili iyang sala. Imo!” pintok nga pulong ni Almira.

“Ngano god tawong ako’y sad-an?. Nga ako may naigo?” sa babaye.

“Diin man kang driving school nag-eskuyla? Tataw man ang motibo nimo nga magpaigo gyud ka. Pag-andar sa among sakyanan, dapat moatras ka aron paghatag lugar sa pag-backing ini. Kun dili, mobusina ka. Aron paghibawo nga naa kas luyo. Aron di mopatuyang og paatras ang naas atubangan nga imong gipaluyohan. Nganong usa pa man ka nibusina pagkaigo na?” ni Almira.

Nakapanglab-ok og laway ang babaye. Gipaningot. Nangluspad.

“Sige, tunga na lang sa damage” sa babaye.

“Sorry kaayo, misis. Ako ang cashier sa among pamilya. Di mi mobayad. Bisa’g usa ka dako nimo. Kiha lang kun gusto ka. Kay moatubang mi” ni Almira. “Tana” niya pa ngadto’s iyang bana. Nakapangawot sa ulo si Zaldy. Nibalik og sakay sa adventure. Nagmug-ot ang babaye nga nagtan-aw sa paksit sa pintal sa bumper sa iyang kotse.

“Mao man tong bayhana ang gireklamo sa mga yaya sa ubang mga bata. Nga high hat ug matapobre” ni  Almira dihang nigawas na sila sa gate sa eskuylahan.

‘Nakasugat og mosukol niya nga di paalkanse,” ni Zaldy nga nagpahiyom.

Padulong na sila sa Guadalupe diin tua ilang balay. Nakapanglingo siyang nakaamgo nga abogadahon diay iyang kapikas. (Katapusan)