Linya

Miss, unsa may buot ipasabot ana?” ni Romy ngadto sa teller nga babaye sulod sa banko. Nag-atubang sila sa counter ug gitudlo ni Romy ang slogan nga gipintal sa bongbong sa banko luyo sa teller. Dagko kaayo’g mga letra ang mga pulong Iningles nga nag-ingon “We find ways”. Nilingi ang teller sa iyang luyo. Distansiya la’g usa ka dupa ang bongbong. Naisa ang mga kilay sa teller. Nitutok ni Romy.

Napikal man gud si Romy rong buntaga. Alas nuybe i medya pagsulod niya sa banko. Unya nangayo dayon siya sa guwardiya og priority number.

“Way number. Molinya lang ka” pintok nga pulong sa guwardiya. Napugos siya paglinya. Trayenta ka tawo pa ang nag-una niya. Hapit usa ka oras iyang paglinya.

Gikapoy siya’g binarog ug anam-anam og irog sa linya. Nasugoan man gud siya’s iyang Papa Dencio pagpadeposito og kuwarta. Maagian ra man ang banko duol sa iyang eskuylahan sa kolehiyo. Nananghid siya’s iyang papa nga moadto’s library sa University of San Sebastian kay mag-research sa usa ka subject niya sa kursong Banking and Finance.

Samtang naglinya pa si Romy, naglibog siyang nagtan-aw sa slogan nga dagko kaayo’g mga letra. We Find Ways.

“Di ba kaha ni minaot lang sa banko?” tuaw niya sa hilom. Kabagulbolon unta siya. Kay gikapoy na siya’g barog. Apan wa man siya’y makitang kaila sa mga nanglinya.

Magsige siya’g tutok sa slogan. Mangyamiid usahay siya. Unya moping-it na man. Hangtud niabot na gyud siya atubangan sa teller. Unya nakahuman nag deposito. Ug sa pagdayong talikod ni Romy, wa gyud niya kapugngi ang pagpangutana.

“Well, we find ways to satisfy our clients” sa teller. Nihikohiko. Mapasergarbohon. “Ask these people standing in line for about an hour, if they are satisfied” ni Romy nga nibukhad sa iyang tuong palad atubangan sa mga tawong nanaglinya. Mora siya’g nagsabwag og abog nga di makita ngadto’s mga tawo. Puro nagmogtok ang mga nawong sa nanaglinya.

Nakanganga ang teller pagkakita sa mga hitsura sa nanagliya. Daw nadunlan. Wa katingog.

“Why don’t you find ways to make them comfortable while waiting to be served?” dugang ni Romy. Nanglipaghong ang teller.

“Nakahibawo ko nga teller ka lang, Miss. Apan kindly relay my word to your manager” ni Romy. Nipahiyom. Nakapahiyom sab ang mga nanglinya. Namakpak.

Mapahiyomon si Romy nga naglakaw pagawas sa banko. Nakapuntos siya. Banking and Finance gud iyang kurso. (Kataposan)