Alho nga nabawog sa lusong

Ting-ani na usab sa humay. Nagkaguliyang ang katawhan, ilabi na gayod sa panimalay ni Ines, ang dalagang guwang nga nangunay gayod og lubok. Taudtaod nang nasigpatan ni Ines, si Tinong, nga nagkadusingot og lubok nga nagpuyo dili halayo sa gipuy-an ni Ines.

Ambot unsang pagbatia nga migimok pagpangamang sa dughan ning usa ka dalagang guwang nga sukad masukad karon pa siya batia ning talagsaong kaibog.

“Nong, kalma lang nianang imong paglubok,” dihay kaparaygon sa panuni sa tingog ni Ines.

“Basin.... ikaw maluya ug subawan kay nagtaligsik ra ba?”

Inay tubagon ni Tinong, nagpabilin hinuon kining mitutok sa sampot ni Ines. Mibundak pagkalit ang ulan. Hapit tanang manglubukay ning dapit sa balangay sa Pitalo, nangahumod sa pagkabasa gawas kang Tinong, nga dali ra nga nakapasilong sulod sa may kusina.

Ambot unsang pagkaunsa ingon man sa nalanay ang duha ka mata ni Ines, nga gibati og dili tiaw nga kaluoy ni Tinong, nga nagpangurog.

“Hain may mas maayo Nong, sulod una diri sa sibay, aron mag-ilis!” ni Ines nga giabot og kabalaka. Wa mokihol si Tinong ilabi na nga iyang namatikdan nga may gihinol og hinay si Ines dapit sa iyang bilahan.

Halawom nang gabii nga nakagawas si Tinong. Mingaw na kaayo ang palibot. Taudtaod nang nanglakaw ang manglubukay. Mao na lang ang naalinggatan ni Tinong ang pagpamuypoy sa iyang kalawasan.

Wa na makabangon si Ines. Ingon sa dihay talagsaong kahapdos nga mikuyanap sa iyang dughan. Ambot unsang pagkaunsaa nga karon pa man niya kini hitagamtami nga may kahapdos. Kahapdos nga way sama. Naglakaw si Tinong nga nagwandogwandog.  Maoy iyang naalinggatan nga ingon sa nabawog ug dili na siya makatul-id sa pagpangihi.

Nakalitik sa tudlo si Tinong, nga sa iyang kamadalidalion, nabiktima siya ni Ines, ang dalagang guwang, nga sa iyang pagtuo mao pay una nga higayon nga nakatilaw.

Nakapanumpa si Tinong, sa iyang kaugalingon ... nga dili na gayod mobalik pa sa pinuy-anan ni Ines, aron maglubok sa iyang humay, nga maoy nakapabawog sa iyang alho.

Hasta makapila manumpa si Tinong sa iyang kaugalingon, nga bahala na lang dili siya kabahinan og humay kay sa mabawog ang iyang alho gikan sa kagahi na sa lusong ni Ines.

Dili matali sa tudlo ang pagbasol ni Tinong, nga dili na gayod siya mopakita pa sa panimalay nila ni Ines, ang dalagang guwang nga maoy nakapabawog sa iyang alho. Makapila kini niya balikbalika nga dili na gayod mopakita pa. Dili naaa! (Kataposan)