Kumosta na ang Talisay City?

Amenado si Mayor JVR nga nabag-ohan pa siya sa iyang paglingkod sa Talisay City isip amahan sa mga Talisaynon. Unang termino niya kini sa pagka-alkalde, busa daghan siya’g mahinungdanong butang nga angay’ng mahibaw-an aron ma-estudyohan unsa bang bahina sa iyang buhatan ang nanobra, o unsa ba ang kulang? Kay hangtod dili niya makit-an ang deperensiya, dili gyud masulbad ang kaguliyang nga naglubog ug nagtago sa iyang palibot.

Panahon sa kampanya sa miaging piniliay, misaad si JVR nga kun maoy modaug, hatagan niya’g trabaho ang wala’y trabaho nga mga Talisaynon. Tuod man, pag-asumir niya, iyang gihimong tinuod ang saad. Daghan siya’g gipuno nga job order sa City Hall nga puno nang daan. Ug dihang miawas na, mipahibalo ang Commission on Audit (COA) nga milapas na ang galastohan sa allowable budget alang sa maong tumong.

Walay nahimo ang mayor. Napugos sa pagpanaktak og mga  job order (contractual workers), diin wala kalikayi nga giunay siya pagbato og mga grabeng pagsaway sa iya mismong supporters sa miaging eleksiyon. Ngano? Tungod kay ang gipabilin ni JVR sa City Hall sagad iya rang mga paryente, ig-agaw o suod nga kadugo. Gani, ubay-ubay man ang mga Muslim nga anaa karon mag-alagad sa City Hall.

Diay, kini si JVR dili lumad nga taga Talisay. Didto diay siya puyo kaniadto sa Mindanao ug didto magdako sa dapit nga daghang moros. Hinungdan, nga hatagan sab niya sila’g trabaho.

Nahiubos ang taga Talisay ning iyang gihimo. Mipasalig man gud siya nga ang hatagan niya’g prayoridad mao ang mga Talisaynon. Apan ang iya diay’ng mga kaliwat maoy giuna. Kini sumala pa sa usa ka Ruel, kinsa lumad nga lumolupyo sa Talisay.

Kahinumdoman, panahon sa pamunoan ni Soc Fernandez, ang kinabag-ang gihayer isip job order, pyur nga mga Talisaynon. Hinungdan, nga natapos na lang ang ikatulong termino sa pagka-mayor ni Soc, wa gyud kini pilde-pilde. Luyo sa kabadlongon sa iyang sinagop nga Joavan, nagpabiling pinangga si Soc sa mga tawo.

Si JVR kaha? Ning iyang gihimo sa mga Talisaynon karon, magpabilin kaha siyang higugmaon ug mahalon? Wala kahay kasingkasing nga molubad ug mosugod na sa pagpanghimaraot kaniya? Sa laktod, wala ba kahay nagmahay nganong siya pa?

Mao kini ang usa sa mga hulagway ubos sa pamunoan ni JVR kun may mangutana: “Kumosta na ang Talisay City?”