Kinsa bay angay mohatag og tubig sa estudyante?

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Usa ka ginikanan kang kansang anak anaa magtungha sa usa ka dakong eskuylahan, mitambong og miting sa Parents Teachers Association (PTA) nga didto mismo ipahigayon. Usa sa ilang gihisgotan mao ang pag-provide sa mga estudyante og drinking water fountain.

Wala makaayon si Boyaks sa dili komportableng impormasyon nga miabot sa iyang dalunggan. Human niya masayri nga ang gasto alang sa maong proyekto adto kuhaon gikan sa pundo sa PTA, sa fund raising nga iyaha sa mga ginikanan, nainat iyang kilay, uy!

Matud niya, sa enrollment pa lang ngadto na sa tuition fee ug uban pang mga balayranan sa unibersidad, kulatado na daan ang bolsa sa mga ginikanan. Unya, ang pundo nga giamot-amot sa mga parents, gamiton pa sa maong tumong?

Nahunahuna man gud ni Boyaks nga ang hinungdan nganong mahal ang singil sa eskuylahan ngadto sa iyang mga estudyante, kini tungod kay ang eskuylahan man ang mo-provide sa mga pasilidad nga gikinahanglan sa mga nagtungha sama sa library, kasilyas, lingkoranan ug uban pa, diin apil na niini ang gripo nga makahatag og tubig nga mainom, o drinking water fountain. “Dili man ni obligasyon sa mga parents; kun dili, iya sa eskuylahan!” Dugang pa sa amahan nga daginotan.

Hinuon, sa University of San Carlos, diin magtungha kining tagsulat kaniadto, ang eskuylahan man mismo maoy mi-install niining drinking water fountain. Mao sab kini ang naabtan sa akong mga anak. Additional facilities kini nga gipahigayon sa mga pari nga libre alang sa tanan: estudyante, ginikanan o empleyado man. Ang eskuylahan mismo maoy nagpataud-himo niini. Ug dili ang PTA.

Importante baya ang tubig. Water is life. Kun uhawon ang estudyante, at least, adunay tubig nga mainom. Apan ang pangutana mao: “Kinsa ba ang angay mohatag og tubig o drinking water fountain sa estudyante dinha sa tugkaran sa ilang tunghaan? Ang mga ginikanan, o ang tunghaan? Kun nabuhat kini sa USC, nganong dili man kini mahimo sa maong eskuylahan?

Nanghinaot si Boyaks nga unta mausab ang hunahuna sa mga kadagkoan sa maong eskuylahan. Nga unta ang maong eskuylahan na mismo maoy moabaga sa galastohan sa drinking water fountain. Buwahan, magamit pa ang pundo sa PTA ngadto sa mga mas mahinungdanon pang butang alang sa umaabot nga mga adlaw.