Binlud

Si Charlie manghod og balig duha ka tuig ni Maria, iyang maguwang. Apan nagdungan sila’g eskuyla. Gikan sa elementarya hangtud sa hayskul. Tungod sa ka suod nilang managsoon, di gyud sila magbuwad. Kay si Maria ang panganay. Ug si Charlie ang ikaduhang anak. Kanunay silang mag-uban sa pagduwa ug pagpanuroy.

Pag-edad og 7 ni Maria, gipa-enrol sa grade one sa iyang Mama Nena. Unya pagsugod sa klase, di mobuwag si Charlie ni Maria. Magsigi’g sunod sunod. Mokuyog man gyud. Gepaeskuyla na lang sab og apil si Charlie. Kay sa probinsiya, matayotayo man sa ilang mama ang mga maestra sa saring publiko. Sa Tubod, Badian sila nag-grade one (1962 pa to. Karon nangapo na sila) Unya “sit in”, binlud o joke only ang pag-enrol ni Charlie. Wa lang sab sila magdahom nga ang pag-enrol ni Charlie mahimong opisyal. Kay dangtag duha ka bulan, matud pa ni Mrs. Silamala, ilang maestra, nga makapasar kuno si Charlie. Nakapasar gyud tinood. Igo rang nakainom og tubig. Nakakuha og average nga 77.

Pagka sunod tuig, nabalhin ang trabaho ni Papa Dario nila sa Kapitolyo. Gi-transfer sila sa City Central School. Didto tungas adlaw na lang ang klase. Hapon kon even number ang numero sa section. Buntagon kon odd number ang numero sa section. (Ambot kun mao ba ni gihapon karon) Ang gamay og numero nga section, mga brayit ang nasakop diha. Ang dagko’g numero, mga bugo. Si Maria tua nasulod sa grade two section 4. Hapon ang klase. Si Charlie tua sa section 5. Buntagon ang klase.

Kay naanad lagi sila nga di magbuwag, gilakaw sa ilang mama nga mabalhin si Charlie sa section 4. Nabalhin gyud. Apan wa magdugay, gibalhin siya’g layo nga section. Kay magsigi’g katulog sa klase.

Gibalhin si Charlie sa section 25. Gikataw-an ni Maria ug sa iyang mama. Apan nanghawod hinoon si Charlie didto. Kay ang maestra sa section 25, motaud og ribbon sa top three sa ilang klase, natauran si Charlie og ribbon nga Third Honors.

Wa lang nila damha nga makakat-on si Charlie bisan sa linghod niyang pangutok. Gipaeskuyla siya’g grade one bisa’g angay pa unta siya sa kindergarten. (Wa pa man siya kindergarten adtong panahona). Di gyud diay maseguro ang pupil nga sit-in, joke only o binlud. (Katapusan)