“Ang Singer”

Sayo kaayo si Jane nga miadto sa usa ka radio station aron magpa-awdisyon alang sa amateur hour kay gusto niya nga masukod kun husto na ba ang abilidad niya sa pagkanta.

Siya pa maoy unang miabot. Matag Sabado sa buntag ang awdisyon aron pagsuta kun kinsa ang madala isip contestants sa amateur hour inigka-ugma, Domingo.

Naghinam-hinam g’yud si Jane nga malakip sa mga contestants kay gipanganti ra ba niya didto sa ilang dapit sa Barili nga madungog gayud nila siya nga mokanta pagka Domingo.

Nagkalingaw lang si Jane nga nakig-text sa iyang mga amiga. Gipahibalo niya ang iyang mga amiga nga tua na siya sa estasyon sa radyo nga pinaminaw sa ilang dapit.

Taud-taud, may laing babaye nga miabot nga buot usab magpa-awdisyon. Nagsultihanay sila ug gisukit-sukit ni Jane ang babaye kun unsay maayong kantahon sa amateur hour.

Unya may migawas nga lalaki gikan sa usa ka lawak nga adunay marka nga recording room. Mitutok kanila ang maong lalaki ug miduol.

“Magpa-awdisyon mo? Sulod na lang mo’ng daan diri sa recording room maayo kay bugnaw sa sulod,” matud sa lalaki nga nagpahiyom.

Mauwawon kaayo si Jane ug ang bag-o niya nga naamiga kay sama kaniya, first time pa usab niini nga salmot og amateur hour.

Miduol pagbalik ang lalaki kanila ni Jane. “Ambi ang inyong mga CD bi kay andamon nato daan,” matud sa lalaki. “Ako diay si Redem, ang technician nga mo-assist ninyo sa awdisyon.”

Nagpaila usab sila si Jane ug Leah ngadto kang Redem. Nag-ulhos-ulhos sa pagpangabot ang uban nga gusto usab magpa-awdisyon.

“Unsay kantahon nimo Jane? Mga nindot man kining kanta sa imong CD,” nangutana si Redem. “Bisan asa ana, kamao man ko anang tanan. Kun ikaw ang papilion nako asa ang maayo,” bawos pangutana ni Jane. Gitagsa-tagsa pagtan-aw ni Redem ang CD, dayon mitan-aw siya pagbalik kang Jane. “Kun ako pa nimo, kining Saving All My Love for You. Taas nuon kaayo ning kantaha apan kun makaya nimo lisud ni malupig sa ubang contestants,” matud ni Redem.

“Sige kana na lang, suwayan nako,” ni Jane pa. Gisugdan dayon ni Redem ang pag-awdisyon kay miabot na ang producer sa amateur hour nga si Emil. 

Gituyo ni Redem nga kataposan na niya nga gi-awdisyon si Jane. Gikulbaan si Jane. Nagsige kini og inum sa gibitbit niini nga bottled water.

Tuod, miabot g’yud ang turno ni Jane nga mao na ang gi-awdisyon. Nahilom ang mga nagpa-awdisyon nga nakadungog sa taas kaayong tingog ni Jane.

Apil si Redem nga daw natulala nga nagsud-ong sa panagway ni Jane samtang mikanta sa sikat nga awit nga gipasikat ni Whitney Houston. -- Sumpayan