Hangyo sa batang caller

Alas 3:00 sa kaadlawon. Mingaw na ang VIP room sa kasino. Ang Pit Boss nga si Ernie, nag-inusara na lang naglingkod sa high chair kay iyang mga tawo gihulaman sa mga area nga aduna pay aksiyon.

Samtang nag-inom sa init nga kape, kalit lang mikuriring ang telepono. Daling nanaog si Ernie ug gipunit ang telepono: “VIP room, good morning.” Kalma niyang sulti.

“Hello, good morning sab. Mahimo mamalihug?” Tubag sa pikas linya.

Naigking si Ernie sa iyang nadungog. May pagkalawom ang maong tingog ug ingon sa gamay pang bata ang tag-iya niini. Nahibulong siya. Kaadlawon pa man god. Wala pay bata nga magmata niining orasa. Ug wala say bata nga manawag dinhi. Kay tanang in-coming calls mag-agi man gyod didto sa trunkline, diin may operator nga gidestino, kinsa di gyod modawat og mga menor de edad nga callers. Pero nganong nakalusot man ni?

“Unsa man tay imong ipamalihug, Dodong?” Sukna-tanyag ni Ernie nga mipaundayon.

“Naa akong mama diha?” Sumpay-pakisusi sa bata.

“Kinsay ngan sa imong mama?” Deretsong pangutana sa Pit Boss.

“Si Mama Tikya Dilaab.” Pinahimutang nga tubag sa bata. Unya mipadayon: “Bigtayim man na siya diha. Dugay na man god na siyang way uli-uli sa amoa. Kaming iyang mga anak, napasagdan na lang. Wa gani na siya mahibalo hain na ko puyo?”

Wa kalikayi, naiknat ang kilay ni Ernie. Naintriga. Busa nagpakisayod: “Kay hain ka na man diay karon, Dong?”

“Nia ko sa langit. Gusto man god ko nga moapas si mama diri nako. Mao nga palihug lang, Sir, sultihi siya nga biyaan na niya kanang iyang daotang bisyo. Ug mobalik na siya’g sulod sa simbahan. Gimingaw na kaayo si Lord kaniya, Sir, ay! Busa, ingna gyod baya si Mama, Sir, ha?” Ug kalit lang misiyok ang dalunggan ni Ernie. Wala na sa linya ang bata. Wala tuyoa, natiurok siya sa iyang nahimutangan.

Nakaila kaayo siya ni Donya Tikya Dilaab. Super VIP player nila kini. Mopapilde’g minilyon ka pesos matag dula. Unya, iyang sultian nga dili na padulaon? Nangita pa man gani sila’g laing mga bigtayim, unya iya na hinuon kining abogon? Ug nakahukom si Ernie nga dili niya pahibaw-on si Donya Dilaab.

Paglabay sa usa ka semana, nadisgrasya si Donya Dilaab. Nahulog ang gisakyang BMW niini sa bung-aw sa Trans Central Highway ug namatay on the spot. Sa laing bahin, didto sulod sa balay-sugalan, gitabang sab si Ernie sa iyang mga kauban kay kalit man lang nalup-og. Ug sa wala pa kini mawad-i sa panimuot, ingon sa may batang lalaki nga mihunghong kaniya:  “Lain kaayo ka, Sir. Wa gyod nimo sultii si mama sa akong gihangyo nimo, ay!” Ug wala na mabati ni Ernie ang uban pang giyawit sa bata kay hingpit na mang midat-og ang (bug-at) nga kangitngit sa iyang kinabuhi. (Kataposan)