Robinhood - Gula 4

Gidala ni Renan ang amahan ug anak ngadto sa usa ka arang-arang nga kan-anan. Sa hilom nalooy si Renan sa amahan ni Carmela kay masabot kaayo niya nga wala gayud kini kwarta. “Ayaw mo kabalaka, walay kuyaw ang sakit ni Manang Meling kay ordinaryo ra man nga apendisaytis,” gialam-alaman ni  Renan sila si Carlos ug Carmela.

“Nabalaka ko sir kay basin og may resita na usab ang doktor para sa mga tambal wala g’yud tawon ko makahuwam og kwarta sa akong pagpauli,” matud sa amahan ni Carmela. “Ayaw kabalaka, ako’y bahala sa tanan ninyong obligasyon. Kun gikinahanglan, balhinon nato si Nang Meling sa private hospital apan naoperahan na man siya,” matud ni Renan.

Human nila’g kaon, mibalik sila sa ospital. “Ma, dia gidad-an ka namo’g pagkaon. Si sir Renan g’yud ang namili anang imong pagkaon apan gamay ra hinoon kay dili ka pa man makakaon pag-ayo,” ni Carmela pa.

Nakita ni Renan nga mibathay ang pahiyom sa mga ngabil ni Meling. “Daku na kaayo mi’g utang nimo sir, ambot unsaon kaha namo sa pagbayad nimo,” ni Carlos pa. “Akong susihon ha kay mora’g pwede na man nga ipauli kini si Nang Meling, adtoon nako ang doktor,” matud ni Renan.

Tuod, wala masayop si Renan kay may tugon na diay ang doktor sa mga nurse nga kun gusto nga mopauli na si Meling mahimo na siya nga mogawas sa ospital. Gitabangan ni Renan si Carmela sa pag-asikaso sa ilang mga release papers. Dunay bayranan ug si Renan pa gayud ang mibayad.

“Balika sila si Mama ug Papa nimo didto ug panghipos na lang mo. Duna lang ko’y kontakon kadiyot,” ni Renan pa nga mikuot sa iyang selpon gikan sa iyang bulsa. Taud-taud miapas si Renan didto sa ward ni Meling. Naabtan niya nga naghunghongay ang tulo.

“Human na mo? Adto na ta,” matud ni Renan nga mitabang pa sa pag-alsa sa mga dad-onon apan  gidali  pag-ilog ni Carlos. “Ayaw sir, mauwaw na kaayo mi nimo.”  Didto sila nagbarug daplin sa B. Rodriguez nga daw adunay gipaabot. Taud-taud, may mihunong nga usa ka Kia Sorento sa ilang atubangan.

Giablihan ni Renan ang pultahan sa luyo. “Sigi na nang Meling, sakay na, hinay lang ha.” Wala makatoo si Meling nga kadto maoy ilang sakyan sa pagpauli sa ilang dapit sa Tabogon. Si Carlos maoy mitupad ni Meling sa paglingkod. Didto gipalingkud ni Renan si Carmela sa lingkoranan sa front seat.

Nanaug ang drayber gikan sa Sorento ug mibanos paglingkod si Renan atubangan sa manobela. “Imo ning sakyanan sir Renan?” wala makapugong pagpangutana si Carmela. — Sumpayan