My pretty sunshine

Si Teresa ug si Edson, I thought they’d last. Sulod sa lima ka tuig sila nag-uban ug puno sa mga pangandoy, parison gayod silang duha. Nakahibalo ako sa kamatuoran nga gihigugma og tinuoray ni Teresa si Edson, mao sab ang nauwahi ngadto sa nahauna.

Sa pagkawala ni Teresa dinhi sa Pilipinas gibisita gayod kanamo si Edson matag karon ug unya. Ako, si Philm, si Juvy ug si Verme. Mangadto gayud kami sa apartment ni Edson ug Teresa.

Gikan sa Lunes hangtud sa Biyernes magdula kami og poker kun dili gani magtan-aw kami og salida hangtud nga kami mangapul-an. Sa adlaw nga Sabado ug Domingo mag-inom kami ug ilimnong makahubog.

Niadtong panahona nabatyagan kong duol kaayo sa usa’g-usa si Edson ug si Verme kay sa ubang babaye nga among kauban. Dugay nga mag-uban sa sala, maghinunghungay ug magsinigpatay sa ilang mga mata.

Pirme gayod silang mag-uban apan wala ko kini panumbalinga kay nalingaw ra usab ako sa among mga barkada apan mas lingaw gayod unta kung nakauban kanamo si Teresa adtong panahuna kay mura gayud siya og kahayag sa adlaw alang kanako. My pretty sunshine.

Sa pagbalik ni Teresa dinhi sa Pilipinas, si Edson kalit lang nahanaw sa ilang gipuy-an nga apartment nga nagabilin og sulat nga nagapulong, “I’m sorry.” Sulat nga gamay ug gipapilit lang sa refrigerator apan makabuak og kasing-kasing sa tawong nahigugma.

Nahibalo si Teresa nga aduna nay problema ang ilang panaghigalaay apan iya lang gihapon kining gikatawa. Wala gayod  niya gikompronta ang lalaki kabahin sa iyang nabatyagan nga kausaban tungod sa kahadlok nga basin makaingon si Edson ngadto kaniya nga kulang og pagsalig. Milarga si Teresa sa America, mahitungod sa kamatayon sa iyang apohan. Ang iyang pamilya nanimuyo sa maong lugar ug gikinahanglan pag-ayo ang iyang presensya. Mao kini ang rason sa pagpuyo niya sa abroad sulod sa usa ka buwan.

Gihigugma ko si Teresa, tiunay ug walay kapuol. Nakahibalo siya sa akong gibati alang kaniya apan si Edson gayud ang iyang gihigugma. Gugma isip amigo ra gayud ang iyang ikadalit kanako. No more, no less. “I am her friend.” (Kataposan)