Maria Magdalena

Gula 137

Sa didto na ko sa gawas, misantop sa akong hunahuna nga wala ko’y kuwarta. Busa nanghulam ko og kuwarta sa tag-iya sa balay ug akong gitugon nga paninglon lang si Darwin inig-uli niya. P300 lang ang akong gihulaman nga igo nakong ikaplite paingon sa Barili.

Tuod man, nahiabot ako sa Barili sa balay sa akong mga ginikanan. Nakugang sila pagkakita kanako kay makaluluoy kuno kaayo kong tan-awon. Mora kuno ko’g burikat nga naughan na.

Gisuginlan ko sila si Papa ug Mama sa nahitabo kanako. Naghilak ko samtang nag-asoy sa akong gidangatan sa mga kamot ni Darwin. Nagpasalamat ko nga bisan sa pagkamasupilon kong pagka-anak, andam gihapon sila si Papa ug Mama nga midawat nako. Nangayo ko og pasaylo nilang Papa ug Mama.

Gisultihan ko si Papa sa matuod nga dili kabubut-on ni Daniel ang nahitabo kanamo kun dili ako’y misulod sa kuwarto nga gipahigdaan kaniya ug namugos nga angkunon niya ang akong pagka-babaye. Nahasiga ang mga mata nila ni Papa Juan ug Mama Linda. Dili sila makatuo nga mabuhat ko kadto. Naniguro lang ko nga usa ka buotang tawo ang akong mabana. Nag-ingon man gud sila nga buotan kaayo ang mga nagtuon pagka-pari.

Sangko sa langit ang akong pagbasol. Nakahunahuna ko nga dili diay maayo nga imong pugson pagkab-ot ang matuod nga langit. Nagkinahanglan kini sa atong pagpaningkamot. -- Sumpayan pa