Saksi nga libog

Sa kaso nga ejectment tali nilang Armando ug Beatriz, nanestigo si Chona pabor ni Armando. Si Chona anak sa pagkaulitawo ni Danilo nga bana ni Elena iyaan ni Beatriz. Walay anak si Danilo ug Elena.Unya gisagop sa magtiayon si Beatriz nga way papeles o hukom sa husgado. Pagkamatay ni Danilo, nipirma og papeles si Elena nga ang yuta ni Danilo iyang gipanunod ug gihatag ngadto ni Beatriz.

Dihang nagpuyo na si Beatriz sa yuta ni Danilo, gikiha siya’g kaso nga pagpapahawa (kon ejectment) ni Armando. Kay konohay ang tinood tag-iya sa yuta ang amahan ni Armando nga sa buhi pa gitikasan kono ni Danilo sa maong yuta. Walay papeles ikapakita si Armando nga iyang amahan, usa ka higayon sa iyang kinabuhi, nakapanag-iya og yuta.

Sa pagpanistigo ni Chona, nipirma siya’g Affidavit pabor ni Armando ug iyang gibarogan ug gipamatud-an ang maong Affidavit atubangan sa huwes. Gipangutana siya (cross examine) ni Atty. Kenneth Kimat abogado ni Beatriz. Namatud-an ni Kenneth nga si Chona bag-o lang giila ni Danilo nga anak niya. Karon lang bag-o nga masakiton na si Danilo. Ug minyo na si Chona ug may mga anak na. Sa gamay pang bata si Chona, wa siya kahibawo kinsay iyang amahan. Wala kagasto si Danilo niya sama sa pagkaon ug pamisti. Wala kagasto sa iyang pag-eskuyla. Wa kahatag og kuwarta bisa’g peso. Way gipirmahan si Danilo nga dukumento pagmatuod nga giila niyang anak si Chona.

“Unsa may diay tomong ug tinguha nimo nga nanistigo man ka ining kasoha?” ni Atty. Leo Ligat, abogado ni Armando, sa pagpangutana sa abogado sa re-direct examination (pag-usab pangutana sa abogadong nipresentar sa testigo). “Angkonon nako ang yuta isip anak o manununod sa akong amahan” ni Chona. Nakapanglab-ok og laway ang duha ka abogado. Hasta sab ang huwes. Namid-ok si Judge Mario Merido, huwes sa MTC sa lungsod sa Bitoon. Nagtinan-away ang tulo ka tawong suheto sa balaod. Nanigang mga mata nilang Armando ug Beatriz.

“If you want to claim the land subject of this case, you have to file a separate action. Not that you will testify as witness for one litigant and assert your claim in this case. You are excused Mrs. Chona Delita,” sa huwes. Minghoy ang nawong ni Chona nga nanaug sa witness stand. “Atty. Ligat, present your next witness,” sa huwes.(Kataposan)