Maria Magdalena

Gula 130

Sa sulod sa motel, didto gitagay namo ang lawasnong kalipay. Medyo dugaydugay ming migawas ni Darwin sa motel. Ug mideretso ko’g pauli sa balay nga nag-taxi.

Igo lang kong nakasulod sa apartment nga akong gipuy-an mibagting ang akong selpon. Gidali ko kini pagkuha gikan sa akong bag kay nagtuo ko nga si Walter ang nanawag. Ug wala gyud ako masayop. Gitubag dayon nako ang tawag ni Walter kay kaganina giahat ko ra bag putol ang among panagsulti.

“Hello?” Paraygon ang akong tingog.

“Kadugay gud nimo mahuman og kaligo? Ganina ra kong nagsige og tawag. Wala gyud nimo gitubag.”

“H-ha?” Sorry, ha, wala ko kadungog sa imong tawag. Na-busy man gud ko sa pagpanglaba,” namakak na sab ko.

“Okey lang. Tuod, kumosta ka na diha?”

“Okey lang. Ayaw kabalaka nako maayo ang akong kahimtang diri.”

“Maayo hinuon kun mao kana. Pag-amping gyud diha kanunay.”

Igo lang nahuman ang panagsulti namo ni Walter sa selpon, mibanos sa pagpanawag si Darwin. Gitubag nako ang iyang tawag.

“Nagsusi lang ko kun nahiabot ka na ba diha,” ni Darwin pa.

“Mao pa lang gyu’y akong pag-abot sa akong gipuy-an,” laktod kong tubag.

“Nganong dili ka man gustong makatultol ko sa imong gipuy-an, Maria?” Duna ka bay gitagoan kanako? May sekreto ka ba nga dili mo buot nga akong masayran?” -- Sumpayan pa