Tsiks — Tirada

Gula 5

Gitudlo ni Kent ang dapit nga ilang adtoon. Nahimutang kini ibabaw sa usa ka nanganaw-kanaw nga bahin sa bungtod nga panagsa sakdap-sakdapan sa mga mapangahason nga panganod ingon man mga gabon. “Kanindot sa mao nga lugar no? Mora’g ato na man nga mahikap ang panganod diha apan layo kaayo no?” ni Daisy pa.

“Tinuod kay diha sa maong dapit mosapigad na sa imong kalawasan ang panganod apan kun tua ka na didto dili nimo kini makita ang panganod. Makabatyag ka lang og kabugnaw sa imong panit nga makabatyag ka nga anaa na sa imong palibot ang panganod,” matud ni Kent.

Mipadayon sila pagbiyahe paingon sa Sitio Cantipla. Paspas kaayo ang pagpadagan ni Kent. Nagtungas ang motor apan tulisan gihapon kini nga mikatkat sa sementado ug nag-ikis-ikis nga karsada.

Anam-anam na nga nakabatyag si Daisy og kabugnaw ug nga daw mingiob ang karsada nga ilang gilatas. “Gisuot na nato ang baga nga gabon Daisy. Paingon na kita sa Cantipla,” matud ni Kent. Gilingi ni Daisy ang dapit nga gitawag og Pung-ol Sibugay nga gihunongan nila kaganina.

Dili makatoo si Daisy nga sulod lang sa mga 15 minutos didto na sila ibabaw sa bukid nga ila kaganina nga gilantaw. Nagkuray na si Daisy tungod sa grabeng kabugnaw sa maong dapit kay daw gihakop na sila sa bugnaw kaayo nga mga gabon.

Midip-ig pag-ayo si Daisy sa lawas ni Kent. Giganahan usab ang reporter sa pagdip-ig ngadto sa iyang buko-buko. Nakasabot si Kent nga gibati na ni Daisy ang grabeng kabugnaw sa panahon.

Taud-taud nakalantaw na sila og gamay nga tiyanggihan. Giparking ni Kent ang ilang gisakyan nga motor daplin sa karsada. “Mamalit ta og makaon. Lami kaayo ang ilang baligya dinhi sama sa bibingka, budbod ug tinanok nga mais,” giingnan ni Kent si Daisy.

“Magkuray man ta dinhi Kent uy,” ni Daisy pa. Human sila makapalit og makaon, misakay sila pagbalik sa motor ug didto gi-parking ni Kent atubangan sa usa ka waiting shed nga gituyo pagpahimo sa pabrika og beer.

Misaka sila og nangita’g maayo nga dapit nga makayaka sa sawog nga kahoy. Samtang gikaon nila ang ilang gipalit nga pagkaon, gilantaw nila ang kabukiran nga klaro kaayo nga makita gikan sa ilang nahimutangan.

“Mao kini ang gitawag og lover’s lane dinhi sa bukid Daisy. Tahum kaayo kining lugara kay makita man ang kabukiran sa atong palibot,” ni Kent pa. Mitutok si Daisy kang Kent. “Kun wala pa kita magkaila dili ko makaanhi niining lugara. Dili g’yud ko makalimot nga ikaw ang akong kauban sa unang pag-anhi ko dinhi,” matud ni Daisy. - Sumpayan