Nahisama sa hulmigas

Sa reunion sa mga kaliwatan sa may apelyidong Madera, nagkapundok ang mga managsoon ug managbayaw. Diha sa Rene, ug iyang mga manghod nga sila si Almira ug Victor. Diha sab ilang mga kapikas. Sila si Aida (asawa ni Rene); Danilo (bana ni Almira); ug Olga (asawa ni Victor).Duha ka adlaw ang reunion (Sabado’g Domingo) nga gisaulog sa dakong wanang sa Paloma Beach sa siyudad sa Dumaguete. Ug wa nagdugay, nisangko ilang istorya mahitungod sa ilang pag-umangkon nga si Greg. Kay wa pa nagsugod ang opisyal nga programa ning sayong kahaponon.

Hapit na 30 ang edad ni Greg. Apan iresponsable gihapong pagkatawo. Igo lang nakahuman og hayskul. Daghang kursong gisugdan, unya way nahuman. May anak na siya kay may babaye niipon niya sa balay sa iyang Mama Eva. Anak si Greg sa pagkadaga ni Eva kinamanghuran nga igsoon si Rene.

Tuas Amerika namuyo si Eva kay naminyo og Amerkano. Way nakat-onang trabaho si Greg. Kay pinadalhan og diyes mil pesos sa inahan matag bulan.

Mga barkada ra niya ang makapahimulos kay kada abot sa kuwarta, mora’g  magpiyesta sa balay ni Eva nga maoy gipuy-an ni Greg ug sa iyang kapuyo nga si Perla. Nanarbaho na lang si Perla sa furniture factory aron dunay ikabuhi sa ilang anak. Manimahong shabu sa kada pundokpundok ni Greg sa iyang mga barkada nga puro may mga motorsiklo.

Nabalaka si Rene. Kay isip bag-ong napili nga konsehal sa ilang lungsod, gihimo siyang pangulo sa Peace and Order Committee. Kay retirado man siyang polis.

“Unsaon ko man lang ning bataa? Nga under surveillance na man na siya ug iyang mga barkada? Dakpon ra ba gyud!” ni Rene. Niping-it atubangan sa iyang mga igsoon ug bayaw sulod sa cottage nga naasayin para nila.

“Wa kay mahimo ana brod. Wa man ka magkulang sa pagtambag. Maayo hinoon nang masikop aron ma-rehab” ni Danilo nga usa ka abogado.

“Iyang inahan, Manoy, nasayud na sa bisyo sa iyang anak. Gibuhong man lang gihapon niya sa kuwarta” ni Almira.

“Maayo hinoon nang madakpan aron mahipos. Kay si Andy atong anak, gigalgal na man anang Greg” ni Aida.

“Hasta sab si Jonathan, among anak ni Victor” ni Olga.

“Nahisama na lang gyud nas hulmigas si Greg. Malumos sa kamay nga nalanay. Kay di na man kapugong sa kaugalingon. Puwerte na mang pagka-adik” ni Victor.

“Ang hulmigas mangita man gyud sa kamay. Bahala’g mamatay. Mao sab na si Greg” timang ni Danilo.

“Nahala. Ipadakop na lang gyud nato nang bataa. Aron  dunay example para sa daghan natong mga anak ug pag-umangkon. Aron mapanaminan nga dili maayo nang bisyoha. Aron di sila matental nga moapil og suyop” ni Rene.

“Alang gyud sa tanang batan-on sa atong lungsod” ni Aida.

Ug naputol ilang istorya. Kay ang MC nianunsiyo nga patindogon sila alang sa awit nga Lupang Hinirang. (Katapusan)