Ug silang duha nahimong usa ka unod

Oy! Milagro, Gal!” Matud ni Fredo, ang higala ni Gally.  “Nganong milagro man, Fred?” “Karon man lang god ko makakita nimo nga di nimo kuyog ang imong asawa. Bisan asa ta magkita dinhi sa Manila, naa kanunay ang imong asawa sa imong tupad.”

“Wa ka diay makabasa sa Biblia, Fred?”

“Mahitungod sa unsa man na, Gal?”

“Matud pa sa Biblia, ‘Tungod niini, biyaan sa usa ka lalaki ang iyang amahan ug inahan ug makighiusa sa iyang asawa ug silang duha mahimong usa lamang ka unod,” patin-aw ni Gally.

“Pero, mouli naman ang akong asawa sa Cebu, Fred, busa ako na lang usa ang magtikaw-tikaw sa akong gipuy-an.”

“Di, makahigayon kana nga mangita og lain nga imong papuy-on.”

“Di ko na mabuhat, Fred, samtang nia pa ako. Ambot lang kaha kun tua ko sa laing nasud, laing estorya na sad to. Hibalo ka Fred, ang babaye, gikuha sa Dios gikan sa gusok sa lalaki sa iyang dughan aron mahalon. Wala kuhaa sa Dios ang babaye gikan sa tiil aron yatakan, patiran o tumban.

“Wa sab niya kuhaa gikan sa kamot, kay tingali unya, iya kining sagpaon, sumbagon. Hinuon, kitang mga lalaki sanglit walay mawala kanato, mahimong mangita kita kun tua ta sa laing nasud apan lumalabay lang kana, Fred, kay alang nako, dili ko ikabaylo ni bisan kinsa ang akong asawa samtang kini buhi pa.”

“Bilib sad ko nimo, Gal, da. Bisan daghan kang babaye sa abroad, apan wa gyud molubad ang imong pagmahal sa imong asawa. Si Virgilio, nakakita lang og guwapa nga Vietnamese sa Saigon, gi-uli sa Pinas ug wa na tunghaa ang asawa. Hasta sab si Nestor, nakig-diborsiyo sa asawa ug gipakaslan ang Guamenia. Ayon, US citizen na.”

“Unsaon ko man nang pagka-US citizen, Fred, kun nahisupak sa kabubut-on sa Ginoo.”

“Ngano man diay, Gal, unsa may kabubut-on sa Ginoo?”

Matud pa sa Biblia, Fred, ‘Ang gihiusa sa Dios, dili angay pagabulagon sa tawo. Busa dili ko uyon anang diborsiyo. Kay bisan ang akong uyab nga Amerikana didto sa Guam, matud niya, ‘Well, Gally, send a divorce papers to your wife in Manila so we will be legaly married and after 60 to 90 days you will get your green card.” Tungod lang niadto, ako siyang gibiyaan. Kay ngano man og dili ko ma-green card holder, di ko lang masupak ang kabubut-on sa Ginoo.”

Mipauli kami sa Cebu ug wa na mi magkita si Fred. (Katapusan)