Maria Magdalena

Gula 126

Si Darwin nagbaton og personalidad nga haom sa gitawag og “a man who has a lot and knows how to use it all.” Mora bag lisod balibaran ang iyang kaambong.

Nagpakisayod si Darwin sa akong cellphone number. Gitug-anan ko siya sa akong numero. Sukad niadto, kanunay na siyang mo-text kanako. Sa kadugayan, mga love quotes na ang iyang ipadala. Hangtod nga nangulitawo siya nako pinaagi sa text. Wala ko man siya tug-ani nga may gika-live in kong lalaki. Ang iya lang nasayran mao nga bulag na ko sa akong bana.

Usa niana ka higayon, nanawag na gayod si Darwin sa akong cellphone. Namugos nga magkita mi sa usa ka kan-anan. Ambot ug ngano nga maglisod man ko sa pagbalibad kaniya. Nakatando gyud ko. Ug nagkita kami.

“Puyde ba kong manguyab nimo, Maria?” ni Darwin samtang nangaon mi.

“Pag-sure, uy,” matud ko. “Dili ko gustong makaguba og pamilya.”

“Wala na koy pamilya,” niya pa. “Nagkabulag mi ug ang akong asawa kay wala kami magkasinabot. Kun mosugot ka, ikaw ang akong ipuli sa iyang dapit. Magtukod kita’g kaugalingong pamilya.”

Nakaingon ko sa hilom nga daghan na gyud kaayong pamilya ang nangabungkag karong panahona. “Dili pa ko andam magpahigot. Okey ra nako kun uyab-uyab lang.”

Ug gidala ko ni sa Darwin sa motel. -- Sumpayan pa