Ikaduhang bathala

Sayo kong nakatulog kay gikapoyan ko sa akong pagtuon sa akong mga leksyon. Eksamin man god nako ugma. Tibuok adlaw kong nagbasa sa mga libro sa akong mga subjects. Fourth year na ko sa kursong Education. Apan nakamata ko tungod sa yawyaw ni Lola Celing ug sa sing-al sa yabag nga kanta sa among tugkaran.

“Di gyud ka mopahawa, ha! Um!”

Kusog ug isog ang tingog ni Lola. Nagdali kong nanambo sa bentana sa akong kuwarto. Sus, maayong pagkahumod ni Noy Galilio nga mao diay ang nagkanta sa among tugkaran.

“Kapan-os!”

Naguba ang nawong sa tigulang nga lalaki. Diha siya sa tungod sa bentana sa kuwarto ni Lola. Nangharana diay siya sa akong biyudang apohan. Nagdala siya’g sista.

“Unsa mousab ka pa, ha, Galilio? Hitsura aning maluibon ay!”

Gilingi ko si Lola Celing. Nagwarawara siya sa gikuptang urinola. Nagtupad man lang god ang among kuwarto maong magkitaay kami sa bentana.

“Ayaw na ko paantosa, Celing. Gimahal tika hangtod karon.”

Mora’g nagpakiluoy si Noy Galilio. apan gisinggitan hinuon siya ni Lola.

“Saba diha! Gahilashilas ka lang. Pauli na, uy, ug ayaw na pagbalik sa pagharana nako, ha!”

Walay tingog si Noy Galilio nga milakaw. Nahimuot ko sa akong nasaksihan. Nahilom na si Lola dihang wala na si Noy Galilio.

Pagka ugma sa gabii, gipakigsultihan ko si Lola Celing samtang nanihapon kami bahin kang Noy Galilio. Wala ko makalugar sa pagpakigsulti niya niini ganina kay sayo kong miadto sa tulunghaan kay Lunes ug lisod ang pagsakay. Eksamin pa gayod nako.

Unsa man diay inyong kaagi ni Noy Galilio, Lola?”

“Ada! Uyab mi kaniadto, uy. Pero ang kanahan, nagminyo’g laing babaye. Nanumpa pa siya nako nga ikaduha kuno ko niyang bathala. Ug ako sab, kay dako mag gugma niya, nanumpa sab niya nga siya ang ikaduha kong bathala.”

“Kanindot diay sa inyong kaagi sa gugma, La, no?”

“Unsay nakanindot nga maluibon man siyang dako? Pagminyo niya, aw, nakigminyo sab ko’g laing lalaki. Patas na mi.”

“Di man kuno matiguwang ang gugma, La. Mahimo pa man ninyong ipadayon ang inyong pagminahalay ni Noy Galilio. Biyudo na man sab siya.”

Nahitiurok si Lola. Wala siya makatingog nga mitan-aw og dugay nako. Naluoy ko kang Lola nga walay kauban sa pagpuyo. Aw, nia man hinuon ko. Gipapuyo ko ni mama ug papa uban ni Lola aron matan-awtan-aw ko ang akong apohan. Dugay kong nakatulog niadtong gabhiona. Nagtuon ko sa nahabiling mga subjects nako alang sa eksamin ugma. Unya nadungog ko ang sing-al sa yabag nga tingog ni Noy Galilio uban sa kutingkuting sa sista. Gipaabot ko ang yawyaw ni Lola Celing. Apan wala man. Unya nahilom ang sing-al ni Noy Galilio. Nahibulong ko. Nanambo ko sa bentana sa akong kuwarto. Wala ko makita sa among tugkaran ang tigulang nga lalaki.

Migawas ko sa akong kuwarto. Miadto sa among balkon. Nakita ko ang anino sa duha ka tigulang, babaye ug lalaki, nga nagtinusikay sa mga ngabil. Nakapahiyom ko. “Natuman gyod ang ilang panumpa.” Nakaingon ko sa hilom. (Kataposan)